2v

[col. 1]

& de toute dolour penible
& le bien convient estre amont
Devant deu car tuit bien isont
& com li biens plus esclarcist
Devant deu & plus sesjoist
Tant a li maus plus doscurtei
& de dolour & de vieutei
En enfer ou il ert touz dis
Tant com dex ert en paradis
Ou dex a touz biens devant lui
& ades aura sanz anui
Touz les a touz les enlumine
Sanz defaute & sanz nul termine
Dex puet tout faire & redeffaire
Sanz rien muer de son afaire
Car il puet tout quanque il vuet
Nule rien en lui ne se muet
Estables est sanz mouvement
De lui muevent tuit mouvement
Cent millier ne li montent mie
A la cent mile mi partie
Dune sole heure de cest mont
Na touz ciaus qui en paradis sont
+ A plus de biens dedenz une heure
+ Dont li menres qui la demeure
Joie · & honor · deduit · solaz
Dont il ne sera jamais laz
Que nul hom penser ne porroit
En · cent mile anz se tant duroit
Li plus sutilx qui onques fust
Si pensast melx que il peust
De cele gloire est dex tous sires
Comme dex· qui valdroit li dires
Car tout seit quanque fu & iert

[col. 2]

& tout a quanqua lui afiert
Onques nul biens ne li fali
A des les a touz devant li
Ainc biens be fu ne ja niert faiz
Qui devant deu ne soit portraiz
Ancois que le monde feist
Or oiez por coi il le fist
Por coi diex fist le monde
Dex fist le monde a son voloir
Por ce quil i peust avoir
Aucune rien qui teile fust
Qui a ses biens partir peust
Sadonc ne perissoit par li
& por ce cest monde establi
Nient por ce que melx lenfust
Ne qui nul besong en eust
Mais il le fist par charitei
& par grant debonairetei
Quil volst comme bons qautre riens
Partist a lui & a ses biens
& que toute autre creature
Chascune selonc sa nature
De sa poissance se sentist
Lonc ce qalui apartenist
Ensi volt cest monde establir
Que tex chose en peust issir
Qui peust entendre & veoir
La noblesce de son pooir
De la sapience & dou bien
Quil fist por homme terrien
& qainsis le peust servir
Que ses biens peust deservir
Les biens quil avoit faiz par lui
Si devons moult amer celui

[Intial, col. 2, lines 8–9: Littera florissa /D/, 2 lines, in blue, ornamented with penwork in red with touches of blue, extending into left margin to form 1-sided border]