f. 028v - 029

Clergie que leur fol savoir
Dont il assemblerent lavoir
Einsi ^/.nest ^/.sera mie fable
Touz ceus qui pour avoir muable
Lessent le bon de bien aprendre
Sont asseur de mal atendre
Car pour avoir sont leur clergie
Si qua petit que nest faillie
Et de ce qui seve en est
De la cite de paris nest
Plus que de nule autre cite
Cele en a la noblete
Des trois manieres de gens
Que li philosophe porsivoient
Au monde. [et] coment
Clergie vint en france
Clergie regne ore a paris
ausi coume ele fist jadis
Atenes qui or siet en grece

Une cite de grant noblece
Li philosofes q^uilec furent
Qui les autres enseignier durent
Ne poserent selonc leur tens
Fors que trois manieres de gens
Clers chevaliers ovriers en terre
Li gaagneur si doivent querre
Aus autres gens leur estovoir
De ce qui leur covient avoir
Pour vivre au monde honestement
Et chevaliers et autre gent
Les doivent garder et desfendre
Lun envers lautre de mesprendre
Clers doivent ces .ii. enseignier
Et de leur oevres adrecier
Si que chascun chose ne face
Dont il perde dieu ne la grasce
Einsi penserent cha arrieres
Les sages gens en .ii. manieres