Le Pelerinage de Damoiselle Sapience

quelle luy proufitera · A paines ay je veu continent que je nay ^veu abstinent · La fain chace le leu hors du bos · et sobresce chasse lennemy hors du corps · La cause dez plus grans pechiez est avoir largement biens temporeulx · Et oyseusete nuyt a lame ou il ya plante de richesses · Je scay quil nest milleur chose en terre que de vivre liement et de bien faire · Fay sans arrester ce que tu pues de bien car tu ne scez come longuement tu le feras et ne destourne nully de bien faire · mais en amonneste chacun a ton pouvoir · Femme belle qui est sotte est ainsi come ung anel au musel dune truye · Se une personne ne vit en guise de pourcel lennemy na povoir sur luy · Es anciens doit estre sapience · et discretion · Apres grans boires et grans mengiers ensuit aucune fois grant povrete · Celuy ne ayme mye Dieu qui ne garde ses commandemens et qui ny met toute son entente et qui ne le craint et doubte · ^{en ce monde il craindera en lautre} Le royaulme de paradis puet on acquerir mais on ne puet eschever les tribulations de ce monde · De tant que tu es plus grant soies plus humble et de bonnaire a chacun et en toutes choses · Se tu veulx acroistre tes vertus · muce les · Celluy veult estre desrobes qui porte son avoir en appert · Foy sans charite est morte · ainsi que ung corps sans ame · Propre sotie est considerer les pechiez daultry · et oublier les siens · Amour et cremeur desordonnee font folement

jugier · Les justes ne puest de nous jugier fors ce que nos oeuvres monstrent · Le jugement nostre seigneur nespargnera nulluy pour prieres de sains ne de saintes ne pour auoir · Lez povres ne sont mye a desdaignier come besongneux mais a honorer comme patron de dieu · Celuy nest mye povre qui a peu mais qui moult convoitte · Le ceur dun homme sauleroit ung escouffle et tout le monde ne le puet saouler · Ceur domme est si noble et si grant que nulz ne le puet saoller fors dieu · De tant qui^l est mains dune chose est elle plus precieuse · Loing de dieu est le ceur qui en oroison entent a vanite · Qui ne puet du tout chastement vivre au mains serve dieu humblement · Mais qui tient boe a une main ne lavera ja bien lautre · Qui est misericors· il fait bien a son ame · Aucuns donnent tousdis et sont tousjours riches · et aucuns tollent tousdis et tous dis sont povres · Se ung juste a asouffrir que aura vng pecheur · Pource que la sentence de dieu tarde nul de pechie ne se garde · Repren le sage il te aymera · Repren le fol il te haira · La bouche qui ment occit lame · Tresgrant vertu est estre juste en abondance de biens temporelz · Mort et vie est es oeuvres de la langue · Le juste sacusera premierement · Lenfant que on laisse faire a sa volente courcera pere et mere · Celuy preste a usure a dieu qui a pitie du povre · Qui

ayme vin et morsiaulx ne sera ja riches · Mieulx vault bonne renommee que moult de richesses · Qui prent don dautruy il est son serf · Ne soustrait point la verge a lenfant tu osteras son ame denfer · Tu es coupable du pechie au quel tu ne contredis au mains de ceur · Peu de chose est de dire je pechie et sy oeuvre paradis · Comment montera en paradis homme orgueilleux et presumtueux quant les angres par leur orgueil en convint descendre · Se tu veulx tost monter en paradis met tout le monde desoubz tes pies · Point achopper ne puet en terre qui en allant lieve ses pieds jusquez au ciel · La volente de mal faire croist quant on ne le deffent · Oste excusance de toy nul ne peche malgre luy · On ne doit mie avoir despit des pechies mais pitie · Ce que on ayme ramentoit on v[o]ulentiers en parolles · Jhesucrist est dieu et vray homme · Dont nayme il mie dieu qui hait homme · Celuy qui nous a tous fais nous recepvera sans doubte se nous nous tenons bien aluy fermement · Beati qui persecutionem patiuntur propter justiciam et cetera · Nostre benoist sauveur dit en levangille · Bien eureux sont ceulx qui seuffrent persecution pour justice · Pourquoy pour ce que on dit que le regne du ciel est leur sans plus acheter se ilz seuffrent en pacience · Autel dist il des povres se ilz prennent en pacience leur povrete · Et

en aultre lieu dit il · Quant les gens du monde fait il vous hairront et reproucheront et dechasseront et diront tout le mal de vous quil porront pour moy · Esjoissiez vous et esleessez car vostre loyer en est grant ez cieulx · Et senecquez ung bon clerc dit · Soiez plus lies fait il toutes les fois que vous desplairoys aux mauvais et les perverses estimations quil ont de vous tenes a grant loenge · Apres dit saint Jehan bouche dor · Ne cremes mie les mesditz des gens mes les loenges · Et saint ysidore dit les serviteurs de dieu fuient et eschevent aussy come tempeste les choses que le monde ayme et sesjoissent plus es adversites du monde quilz ne se delittent es prosperitez · Aux amis de dieu toutes les choses de ce monde sont contraires pour ce que quant il sentent les adversitez quilz soient plus ardamment esveillies a desirer les choses celestielles · Celuy reluyra devant dieu par grant gloire qui se fera pour luy despiter au monde · Et vrayment il convient que cil soit amez de dieu qui est hays du monde · Car lamour de dieu et lamour du monde sont contraires· Et pour ce hait le monde et le deable ceulx et cellez qui dieu ayment et crement · Car il naiment ne luy ne ses choses et leur pourchassent trestout lannuy quil puent · mais nostre seigneur nous conforte moult bien en levangille la ou il dit a ses disciples · Ne vous emerveillies mye se le monde vous hait · Car sachies quil ma

hay avant ^{que vous} · Se vous fuissies du monde le monde amast ce que syen fust · Mais pour ce que vous nestes mye du monde ains vous a esleu du monde · Pource vous hait le monde mais aies fiance en moy car jay vaincu le monde · Ne cremes mye ceulx qui le corps occisent car ilz ne puent occire lame · Mes cremes celuy qui a povoir de mettre le corps et lame eu feu perdurable · Se nous ne devons mie cremir ceulx qui nous corps veullent et puest occire · Comme mains devons ore cremir ceulx et cellez qui nous puest fors menacer ou de nous mesdire · Mes mement que nous ayons nostre seigneur jhesucrist par dessus qui tout voit et tout scet et tout puet qui ne laisse nully tente oultre ce quil puet souffrir · Hee beaux doux jhesucrist comme je doubteree peu to^t le monde sil avoit prins guerre a moy et me vousist faire du pis que il pourroit se je vous avoye en aide · Certes qui vous a il a tout · Et qui ne vous a il na rien · Beaulx doulx jhesu crist toles me tout si me donnes vous seul et il me souffira · [tout si me donnes vous seul et]

[Marginalia: Left margin at line 1, in light brownish-grey ink, in an early hand: "amon bon amy"]

[Marginalia: Left margin at lines 2–13, in pale brown ink, in an early hand: "hay avant / Qe vous / souffies / du / monde / le munde / amast ce / que sien / fust / [s?^m]"]

[Marginalia: Left margin at lines 21–22, in light brownish-grey ink, in an early hand: "[sonss]"]

[Addition: Bas de page, centre, institutional stamp in dark blue ink, consisting of an ellipse within a slightly larger ellipse; between the two: (label: VICTOR ADVIELLE · ARRAS·)]