Le Pelerinage de Damoiselle Sapience

Qui tost donne deux fois donne · Celuy donne tart qui donne a celuy qui prie · Plus eureux est le donneur · que le prieur · Benoite soit povrete se dieu ne leust ainchois soufferte nous ne la vousissemes souffrir · On doit amer aussi bien ce que on na mye que ce que on a · Lavaricieux est a aultry malvais et a luy pervers · Humble doit estre confession par quoy on amende orgueilleuse deffaulte · Justes juge ne puet nul estre qui a la fois soy mesmes ne se juge · A peu est lomme mort qui ne doubte point quil morra · De tant est le pechie plus tost pardonne quil est fait a mains de malice · En toutes adventures de povrete tresgrans grietez est avoir este riches · Peu de chose souffit a nature et a avarice rien ne suffit · Ce qui nous fait tresmauvais cest que nous ne considerons nostre vie · Rien vouloir scavoir est negligence · Et nient scavoir est ignorance · La ou on ne craint celuy qui reprent vient le diable legierement et tost chiet on en pechie · Oste envie de toy et quanques tu as est tien · Orgueil oste dieu de luy · Envie oste son proisme · Se ne feust tien et myen tout le monde feust en pais sans labeur · Com grant bien est que de charite qui les biens du monde fait estre miens · Dont ung bon a prouffit et ung mauvais doumage · Tu ne peulx plus grever les envieux que vivre liement et faire bien ·

Discordans et mescreans combien que ilz aient de vertus ne peuent estre espirituelz · Qui ne satrempe par humaine raison necessite est qui vive come une beste · Se nest rien de chastete de char se il nya doulceur et debonnairete ou ceur · Les yreux nont mye richesses bonnes mais ilz ont moult damertumes · Ire est porte de tous pechiez · Dieu nabite point avec Ire · mais il est ou est paix · et paix est son testament · Dieu est amours · dont qui hait aultruy il na mye dieu · Estriver a son souverain et a son maistre est peril et dommage · A son semblable mauvaistie · A son subget deshonneur · Il nest rien si semblable au deable que tenchiers et noeses · Ceulx qui subment discorde estaignent charite · qui est mere et fleur de tous biens · Cest plus grant merite envers dieu de injures fuir en soy taisant que vaincre en tenchant et respondant orguilleusement · Comment sescusera au jugement celuy qui donne a ung chien cen pour quoy ung povre a grant disete · On doit viandes prendre aussi come medicine · Son jeune de viandes on doit jeuner de pechier et adonc est la jeune bonne vers dieu · quant on jeune de pechie · Et est bonne quant ad ce que tu mengeroies bien tu saules ung povre · Jeune sans charite est lampe sans clarte · De tant que nous nous sentons plus agreves de penseez devons nous

[Marginalia: Left margin at line 15, "Nota"]

plus ardaument entendre a oreson · Tout le temps que tu ne penses a dieu conte lay pour perdu ce dit Saint Jherosme · Pense de dieu le mieulx que tu pourras et de toy le pis que tu pourras · Le deable vaincu de glotonnie ne tempte de luxure · Celuy qui maudit son anemy il maudit sa propre ame · Nulle chose qui adviengne au juste ne le courcera · Nulle chose ne vault tant a refrener la char que penser quelle elle est quant elle est morte · Lamour du monde est contraire a lomme qui ayme le monde il ayme celuy qui le trait · Celuy est pervers a qui Dieu ne souffit · Car qui la riens ne luy fault · Le corps est repeu de viandez materielles · et lame de bones oeuvrez · Chastete sans bonnes oeuvres nest mye grant chose ne bonnes oeuvres sans chastete · Nostre char nous trait a pechie · Discipline nous trait a pardon · Je vous conseille damer vos ennemis pour sanner voz pechies je ne scay milleur remede · Dieu nest ja bien amez sans son proisme · ne son proisme sans Dieu · Celuy a charite vraye qui ayme son amy en dieu · et son annemy pour dieu · Ce qui est hault et noble devant les hommes est abhominable devant dieu · Qui de parfaite pensee desire dieu sans doubte il a cen quil ayme · Pluseurs crient hault a dieu prier et leurs ceurs sont muyaulx · Et aucuns se taisent

et leur penseez crient hault devant dieu · Tu qui ne doubtes rien sur terre · Craing dieu toutes choses sont soubz luy · Conscience malvaise mil mal a faire ne redoubte ce dit Saint gregoire · La plus belle science qui soit est scavoir bien amer · Celuy est amys qui ayme plus le prouffit de son amy que sa plaisance · Celuy est riche ou le saint esperit habite · Oroison oynt dieu mais la larme le point · O benoite larme du repentant come tu es puissante envers dieu quant tu mues ung tel juge en doulx pere · Le ventre plain de vin et de viande de legier se met a luxure · Se tu veulx estaindre le feu de luxure oste les tysons des viandez · Vins et femmes font les hommes devenir mauvais et luxurieux · Oy · voy · et te tais se tu veulx vivre en paix · Oncques les mains [de dieu] ne furent trouvees sans don · ou le ceur est plain de bonne voulente · Legierement chiet en pechie qui plus doubte les gens que dieu · Donne a dieu selon son don · Il se donna du tout a toy or te donne du tout a luy · On ne doit point doubter du trespas de celuy qui a bien vescu et garde les commandemens de dieu et de leglise a son povoir · Pren garde sou^bvent ou tu hebergeras la premiere nuyt de ton trespas · Tu dois peu penser a ton soulas · et fort a ton salut · Se celuy qui ne donne est damne quel paine aura celuy qui toust par force a

[Marginalia: Bas de page, at left edge of text, in an early hand, in grey ink: "quel pa[in]"]

aultruy · Amour et cremeur bien ordonnee fait faire tous biens et escheur tous maulx · Pour voye ton ame dieu pourvoyra ton corps · car le reaulme du ciel et les ^biens temporelz sont tous siens · Apren toy mesmes a congnoistre de tant congnoistras tu mieulx dieu · Je voudroye que les envieux eussent leurs yeulx par tout si seroient tourmentez de toutes les joyes dautry · Il nest si juste chose au monde que denvie car elle pugnist et tourmente son propre seigneur · Le deable a peu de force · il ne vaint que ceulx qui veullent estre vaincus · Dieu est loyal qui ne laisse nulluy estre tente oultre ce quil puet souffrir · Benoist est celuy qui seuffre tentation · car quant il sera esprouve il aura couronne de gloire · Nous avons bon mestier de nous bien garder car quanques nous faisons nous faisons devant celuy qui tout voit · La ou on ne fait justice habitent voulentiers larrons · tu es roy et bailly de toy mesmes · Toute beste doubte homme · Mauvaise langue est plaine de venin mortel et du feu denfer · La cause et la racine de tous maulx est soy mesme trop amer · Se tu aymes mauvaisement tu heez se tu heez adroit tu aimes · Nul homme ne scet combien il vault · De autelle entente recepvera dieu ce que tu fais · comme tu le fais · Qui ayme aucune chose pour son prouffit il lamera tant