ENPages
1
Seint Dunston was of enguelonde · i-come of guode more · Miracle vr lord dude for him · ȝit he was vnbore · For þo he was in his modur wombe · a Candelmasse day · Muche folk was at Chirche · as hit to þe tyme lay · As heo stoden alle wiþ heore liht · as me stondeth ȝit now · Heore liht queynte oueral · ac neuer on nuste how · Her riht hit brende swiþe wel · and her riht hit was oute · Þat folk stod in gret wondur · and weoren ek in gret doute · And speken euerich to oþur · in whuche maner hit were · Þat it qweynte so sodeynliche · þat liht þat heo beere · As heo stoden and þerof speken · in gret wonder vchon · Seint Dunstones Modur Taper · a fuire wory anon · Þat heo huld in hire hond— · heo nuste ȝwannes it cam · Þat folk stod · and þis bi held · and gret wondur þerof nom · No mon nuste fro whenne hit com · bote þorwh vr lordes grace · Þer of heo tenden al heore liht · þat weoren in þulke place · ¶ What was þat þat vr lord crist · from heuene þat liht sende · And þat folk · þat stode þer aboute · heore taperes þerof tende · Bote þat of þulke holy child · þat in hire wombe was þere · Al Engelonde scholde ilihted beo · betere þen hit euere were ¶ Þo þis Child was ibore · his frendes nomen þerto hede Heo letten hit do to Glastyngburi · to norischen and to fede · To techen him ek · of his bileue · Pater noster and Crede Þat child wox · and wel iþeih · as hit moste nede Luytel ȝeme he nom to þe world · to alle godnesse he drouh · Vche mon þat herde of him speke · hedde of him · ioye inouh ¶ Þo he was of Monnes wit · to his vncle he gan go Þe Erchebisschop of Caunterburi · Aldelm þat was þo · Wiþ him he made ioye inouh · and euere so lengor so more Þo he sayh of his godnesse · and of his wyse lore · For gret deynte þat he hedde of him · he lette him sone bringe To þe prince of Engelonde · Adelston þe kynge · ¶ Þe kyng him maude Ioye inouh · and grauntede al his bone Of what þing þat he him wolde bidde · ȝif hit weore to done · ¶ Seynt Dunston him bad a place · þo he was forþ ibrouht · In þe Toun of Glastingburi · þat he him warnde nouht · Þe kyng him grauntede his bone þo · and aftur hym also · Edmund his broþer þo he was kyng · and in pouwer was ido · ¶ To Glastyngburi he wende sone · þe goode Mon seynt Dunston · Þo · boþe þe kynges ȝeue him leue · Edmund and Adelfston · A feir Abbey he lette þer arere · as me iseo ȝit þer stonde · Of Blake Monkes · þas was arered · furst in Engelonde For vche Abbey of Engelonde · þat of Blake Monkes is · Of þe hous of Gastingburi · furst sprong and com iwis · Him self he nom þe Abite þere · and Monk furst bi com · Sone he was Abbot of þulke hous · and gret Couent to him nom · And made þere Godus seruyse · studefast and stable inouh · Þe Couent þat þerinne was · to alle godnesse drouh · ¶ Þis holi Mon seint Dunston · hedde gret pouwer · With þe kyng Edmund þat was þo · al his Counseyler · Aftur kyng Edmundus deþe · a godewhile þer was agon · Þat Egwyne his sone was kyng ymad · ac not after anon · Þis Egwyne hedde wel vuel red · and þer aftur he drouh · Wiþ seint Dunston he was wroþ · and wiþ wel gret wouh · Of his Abbeye he drof him out · and dude him schome inouh · So more schome þat he him dude · so more þe goode mon louh · He let him driuen out of Engelonde · and let him crie fleme · Þe gode mon wende him forþ gladliche · and þerof nom no ȝeme · To þe Abbeye of seint Amaunt · bi ȝonde þe see he drouh · And soiornde þere longe · and good lyf ladde inouh · ¶ Þo þe king Egwyne was ded · Edward þat was his broþur · Aftur him was kyng ymad · for he was neer þen anoþur · Swiþe good mon he bi com · and louede wel holy Churche · And vche mon · þat him þerto radde · aftur him he gon worche · Me tolde him of seint Dunston · þat his broþur drof out of londe · Wiþ vnriht for his goodnesse · and gon him vndurstonde · Aftur him he sende anon · þat he come to him sone · And also ben his Counseyler · of þat he hedde to done ·
2
¶ Seint Dunston com hom aȝeyn · feire was vndurfonge · And hedde his Abbeye al in pees · from whom he hedde beo longe · Wiþ þe kyng he was swiþe wel · and was al his Counseyler · Muche me spac of his godnesse · wel wyde fer and neer · ¶ Hit bifel þat þe Bisschop · of wircestre was ded · Þe kyng and þe Erchebisschop eoden · and þerof nomen heore Red · And þe holy mon seint Dunston · Bisschop heo maden þere To maken him herre in Godus lawe · þeih hit aȝein his wille were · ¶ So me askede at þe Erchebisschop · of Caunturburi · sire Ode · Wherfore heo him Bisschop made · and whi his graces weore so gode ¶ For he schal quaþ þis goode mon · after me her beo · Erche Bisschop of Caunturburi · and þat me schal isee · ¶ What wostou · seide þis oþur þo · þou spekest foliliche iwis Þou nost no more þen þi foot · ac vppe God hit is · ¶ Mi leue Frendes quaþ þis goode mon · ȝe ne þorre me blame nouht · For wel ichot þat my lord crist · in my mouþ haþ hit brouht · Bisschop of Londone he was seþþe · seint Dunsto also · Of Londone · and of Wircetre · and heold hem boþe two · ¶ Hit bi fel þat þe Erchebisschop · of Caunturburi was ded · Þe Pope · and þe kyng Edward · þerof nomen heore Red · And maden þe gode mon seint Dunston · þat he was Bisschop þere · Þe goode men þat him loueden · wel glade þerof weore · And þe rihtes of holy chirche · he heold vp faste inouh · Þe Cristendom of Engelonde · to good stat he drouh · HE ordeinde þorwh al Engelonde · þat vche Persun scholde cheose · To witen him chast from Lecherie · oþur his Churche leose · Seint Adelwold was þulke tyme · Bisschop of winchestre · And Oswold þe holy Mon · Bisschop of wircestre · Þeose twey Bisschopes · wiþ seint Dunston · weoren alle at one Rede · And sire Edward þe goode kyng · to don þis goode dede · Þis Bisschops wenden abouten · þorw out al Engelonde · And luþere persuns casten out · hem ne mihten non astonde · Heore Chirches · and heore oþur good · clanliche heo hem bi nome · And bi setten hit in goode Men · þorwh þe popes graunt of Rome · Eihte and fourti Abbeys · of Monkes and of Nonne · Of þe tresour heo arereden in Engelond · þat of þe persons were iwonne · For so hit was · bet bi set · þen hit were er on schrewe · For whonne gode Maystres beoþ · sum goodnesse heo wolleþ schewe · Gode weoren þe þreo Bisschopes · þat þulke tyme weren þo · Þe betere hit is in Engelonde · for hem euer mo · ¶ Vr lord ȝaf seint Dunston · on eorþe so feir grace · Þat on a tyme · as he was · in a priue place · His Fader and his Modur ek · in þe Ioye of heuene an heih · Aftur þat heo weoren dede · wel aperteliche he hem seih · Gret loue vr lord him kudde · whon he him schewede þere · So muche of his priuyte · þe while he alyue were · ¶ As he lay a noþur time · in his reste a niht · He sayh þe Ioye of heuene · and þe place þer inne wel briht · Aungels he herde syngen also · a Murie song þer Inne · Þat me syngeþ in holy Chirche · whon me þe Masse bi ginne · Kyri leyson · christeleyson · was þat Murie song · Þe holi Mon þat þis i herde · hit ne þhouhte him no þing long · Wel ouhte he to heuene come · at his ende day · Þat while he was alyue · so muche of heuene he say · ¶ Harpe he louede swiþe wel · for of harpe he couþe i nouh · Aday he sat in his solas · and a lay þer on he drouh · Þe harpe he heng vp bi þe wouh · þo hit was tyme to ete · Þo hit was redi þerto ibrouht · he sat doun to his mete · Of heuene he gon þenche sone · of ioye þat was þere · Of þe Ioyful blisse þat þer was · among halewen þat þer were · His harpe þat heng so bi þe wouh · of whom he luyte Rouhte · Bi gon to kuiþe his holy þouht · ded treo þeiȝ hit were · As vr lordus wille was · hire herden alle þat weoren þere · Al bi hire self · heo gon harpen · a Murie Antempne iwis · Þat me singeþ ȝut in holy churche · þat on Englisch is þis · Holy soulen glade beoþ · þat in heuene beoþ ido · And suweden vr lordes wey · and for him schedden also · Heore blod · for his swete loue · þerfore heo schulen wone · And knyhtes beo wiþ outen ende · wiþ crist Godus sone · Þis Antempne þat murie is · as þis folk iherden alle · Þe harpe song al bi hire self · as heo heng bi þe walle · Feir grace vr lord him schewede þer · whon þat dede treo · So scholde singen of þulke Ioye · þat he scholde Inne beo · ¶ Þis holy mon hedde ilyued · on eorþe mony aday · And his ende day was neih icome · as he him self sayȝ · An holi þoresday he wex sek · as hit fel in þe ȝere · He let clepe of his frendes · þat specials to hym were · His Men þat him serueden ek · he lette hem clepe also · And for ȝaf hem · heore trespas · þat heo him hedden misdo ·
{column}
And asoylede hem of heore sunnes · as he in Godus bendes lay · And so he lay in þulke tyme · and eke þene Friday · He lette clepe þe Saturday · þe Freres bi foren him alle · And bad hem alle haue god day · and seide what him scholde bi falle · He let him don al his Rihtes · and vr lordus flesch he nom · And wende out of þis world · and to heuene wel sone com · Now swete lord seint Dunston · þat vre Erchebisschop were · Bring vs to þe Ioye of heuene · as Angles þi soule bere · A · M · E · N ·