Egerton_2810_St._Austyn

SEint Austin þat cristindom · broȝte to Engelonde. Riȝt is þat amonge oþer iwis · he be vndirstonde. Seint Gregory þe holi man pope · was at Rome Engelond he louide muche · þei he þer neuir ne come. Me tolde him þat þe londe was · ^⁊ þat it heþene was. Sori was seint gregori · þat hit y cristind nas. ¶Him sulfe he wolde habbe · ywend · her in to engelonde Ac he ne moste vor is cardinales · ac ssholde sende is sonde. ¶Wiþ an vourti of godemen · seint Austin he nom. And ysende hom in to Engelonde · to prechi cristindom. Þat echon monkis werre · seint Austin ⁊ eke þeoþir. Þis holi men wende vorþ · þat werre alle is broþir. ¶Aftir þat god was ybore viiue hundride ȝer it was. And vourescore ⁊ nei tuo ȝer · þat hy dude þis holi cas. Hy draddde sore vor hy no couþe · þe speche of engelonde. Hy nome mem þat couþe · þe langage vndirstonde. ¶Hy dude hom vorþ in þe se · ⁊ þo hy þudir come. Toward þe hauene of engelonde · þan riȝte wey hy nome. To an yle by este kent · hore sschip gan euene wende. Þat theuet is yclupid · as hourre louird wolde sende. ¶Þer hy nome verst har in · ⁊ nome hom sone to rede. Hou hy miȝte beste ontake · ^to do þis holi dede. ¶Þe kinge ailbriȝt þa^t was þo · kinge of engelonde. By agqueynte messager · vairre he sende hor sonde. Þat hy werre messagers · ⁊ fram an heie man ycome. To don him an message · ffram þe court of rome. ¶Þat ssholde wyþoute ende · tohim alto alis londe. To gret prow ⁊ to gret richesse · ȝuf hy wolde vndir vonge. ¶Þo þis word to þe kinge com · he stode awile in þoȝt. God tidinge he sede mote itbe · þa^t hy habbiþ me ybroȝt. Vndir vongeþ hom vair ynoȝ · ⁊ honouriþ hom also. ⁊ vindiþ hom plente ynoȝ · of þat hy habbiþ neode þer to. Vort ychabbe wiþ hom yspeke · ⁊ hore message yse. God leue as hy me by hotiþ wel · þat it mote prou be. ¶Hys heste was ful wel yholde · me auenge vairre ynoȝ. Þe kinge toward þulke yle sone þer aftir droȝ. ¶Þo he to þe yle com · to seint austin he sende. Þat he to do is message · wiþ his felawis to him wende ¶Seint austin him greiþid wel · ⁊ is felawis echone. Vorto viȝte aȝen þe deui · ⁊ to bataile gone.

Hy made þe signe of þe croize · oþer armis nadde hy non. Vor to do þis bataile · ⁊ ouir come hore fon. ¶A croize of sulfur wiþ þe forme · of god hy lete arere. And instude of baner · byuore hom þerre hy berre. And ȝeode voþ wel baldeliche · as hardi kniȝtis ⁊ gode. And siwede hore swete baner · wiþ þe fourme of þe rode. ¶Hy gunne to singe hore letanie · vor prou of þe londe. Þat ourre louird hom sende gr^ace · hore prechinge to vndirstonde. Þe kinge hy grette swiþe vair · þo þa^t hy to him come. And sede hore erande þat hy broȝte · fram þe court of rome. ¶And prechid hom of crⁱstindom · ⁊ of ourre louirdis lawe. Þat godir hele him ⁊ alle is · wolde he þer to drawe. Hy bi hete him þe ioye of heuene · þa^t so riche was ⁊ is. Þat he ssholde terne atir þis lif · to þulke ioye ⁊ blis. ¶And be þer wyþoute ende · wiþ god þa^t ous boȝte. Þe kinge stod þo he ihurde þis · as þei he werre inþoȝte Swiþe valse þinge hit is he sede · þa^t ȝeo by hotiþ me. Werre i^c siker þat hit werre soþ · don ich wolde aftir þe. ¶Ac yne concentin noȝt þer to · vor it is ȝut so inewe. As ichabbe more vndirȝete · werre þis message be trewe. Ac vor ȝe þus ytraueilid buþ · fram so verrene londe. And vor mine gode as ȝe seggeþ · ⁊ doþ me vndirstonde. ¶Greiu nolle ich ou noȝt · ac wel vairre be ȝou do. And vndiruonge ⁊ vinde ȝou eke þa^t ȝeo habbiþ neode þer to. And i^c granti alle eke · þa^t wolliþ to ȝou terne. Gode leue ich ȝeue eche mon · ynelle noman werne. ¶Þis was atte verste me þenchiþ · god by gunnynge. Þer aftir was þe beterre hope · to come to god endinge. Seint austin ⁊ alle is · aswiþe vairre wonienge. Þe kinge ȝaf inþe toun of douer · to don in is prechinge. ¶Seint Austin ⁊ is felawes · by gunne to prechi vaste. So þa^t sone þa^t gode wer · to hom hore herte caste. Vor to terne to cristindom · ⁊ so lenge so mo. So þat alle þat volke aboute com · so þikke so it miȝt go. ¶So þat hore dede so wide sone · þa^t to þekinge com. So vairre miraclis þat hy dude as hy prechid cristindom. Þe kinge wende ⁊ yhurde hore prechinge · hit þoȝt him wel god. To longe he sede ichabbe ybe · ar ich þis vndirstod. ¶He turne him to cristindom · ⁊ let him baptisi anon. And bileuid on Ihesu crist · ⁊ is men echon.

So longe þat þis holi men : hore wille hadde atte nende. Þat þet volke of eueriche toun : to cristindom gan wende. ¶Seint austin wende aȝen þo : ⁊ þo he þudir com. Twelf busschops he made in engelonde : to wardi cristindom. And þe þritteþe he was him sulf : as ourre louird ȝuf þat cas. Erchebusschop of douerre : þe verste þat euerre was. ¶Sein austin broȝte cristindom þus : into engelonde. ¶Wel aȝte we is day holde : ȝuf we werre vndirstonde. His dai is toward þe ende of may : vor þulke day he wende. Out of þis liue to ihesu crist : þat aftir him þo sende. ¶Þe kinge ailbriȝte deide þo : siþe hundrid ȝerre wel riȝt. ¶And sixtene aftir þat ourre lourid in is modir was aliȝte. And on ⁊ twena ȝer also : aftir is cristindom And in þe sixe ⁊ viftiþe ȝerre : of his verste kindom ¶Nou bidde we ȝerne seint. Austin : þa^t to cristindom ous broȝte. Þat we to þe ioie come : to wan ourre lourd him boȝte. AMEN