Image du Monde en vers

Dont cele gent sont deceu Qui mahommet ont retenu Cele part sont une autre gent Crestien en dieu miex creant Em bataille puissant et fort Que sarrazin doutent tant fort Que ne lor osent riens mesfaire Ains lor sont dous et debounaire Et sont tout enclos en virons De gent mescreant, et felons Cele gent sont bon crestien Et ont anon georgien Car Sains jorge, apelent tous jors En batailles, et en estors Contre paiens, et si laorent Sor tous autres sains et honorent Si ont tuit reses les corones Dont li clerc les portent reondes Et li lai quarrees les ont Quant le sepucre a[...]er vont Li sarrazin, nes osent prendre Ne paiaige, ne riens sor vendre Quil doutent quil ne revenissent Que chier as autres nel vendissent Les gentils dames, dou pais Bien se combatent par pais Armees sor chevals de pris Ensamble avecques lor maris Tous lor langaiges et lor lois Sont a maniere de grygois

Que .ij. hommes en sont bien carchie Dou porter alor cals apie Petis arbrissials i plante on Chascun an, et portent coton Si croissent unes chanes grans Planines de sucre, par dedans Ou li basmes croist EN babyloine alun des chies Croist li basmes, qui tant est chiers Et le cultivent crestien Dont li sarrazin dient bien Qui sovent lont fait esprover Que quant il le font cultiver A autres gens, qua crestiens Si ne puet porter cel an riens En ce camp ou li basmes croist Dient cune fontainne inaist Ou marie baigna son fil Et de celi la rousent il Ne aillors nen pueent planter Ou il puisse nul fruit porter Autre arbre en cele terre sont Quen lieu defuelle, une lainne ont Dont on fait dras soustiex et biaus Dont on fait cotes et mantials Si sont autre qui portent fruit Molt soef oudorant par nuit Se repont en larbre et revient Au matin quant li solaus vient Uns autres arbres i renaist

[initial: 8th row, opening initial /E/, 2 lines, in blue with red pen flourishing]

O dautres choses quon imet Qui est si chaus quant pres est Que daigue estaindre nel puet on Fors daisil, dorine, et de sablon Cele aigue vendent sarrazin Plus chiere quil ne font bon vin Autres fontainnes daillors isent Qui plaies, et mals, diels garissent Autres sont qui rendent memoire Autre oubliance et font encore Autres qui luxure refraignent Autres resont qui les rengraignent Autres sont qui les femes font Enfant porter quant nul nen ont Autres qui font brahaignes estre Et de porter lor talent naistre Flun sont qui font noires brebis Et noires blanches par devis Si sont estanc, por nule riens Ni puet durer, ne hom ne chiens Nautre beste, ne nus poissons Que tantost ne sen voist aufons Ou nus hom assommer ne puer Mais par dehors, floter lestuet Autres fontainnes chaudes sont Qui les larrons a vugler font Qui se parjurent dou mesfait De larrecin quant il lont fait Et son li met sus por noient Semboit, et voit miex que devant

Et qui plus mist clergie avant Que nus qui fust, napres navant Icil prouva, tous premerains Que il nert cuns seus soverains Qui tout fist, et dont tout bien muevent Et si livre encor bien le pruevent Quil nest cons seus soverains biens Cest diex qui fist, toute autre riens Et en cele seule unite Prouva il droite trinite Son pooir, son sens, et son bien Ces .iij. claimment li crestien Pere, et fil, et saint esperit Li peres la poissance dit Et li fiex dist, la sapience Sains esperis, la bien veillance Aristotes qui vint apres Len sievi, et le tint si pres De molt de choses que dit eut Et de lui li vint ce quil seut Lart de logique, ordena bien Car plus enseut que dautre rien Li dui .iij. parsones troverent En un seul lieu, et le proverent Mais nen mirent rien en latin Car andui furent sarrazin Com cil qui furent ains le tans Jhesu crist plus de .ccc. ans Si furent tout li livre en grieu Mais puis vint boetes en lieu

[initial: 7th row, opening initial /A/, 2 lines, in red with blue pen flourishing]