Image du Monde en vers

Comment on doit former parole Soit en latin ou en roumans Et en tous langaiges parlans Qui bien savroit toute gramaire Toute parole savroit faire Par parole fist diex le monde Car sentente est parole monde La seconde ars logique LA seconde ars si est logique Con apele dyalethique Ceste si prueve, voir et faus Par quoi on connoist biens et maus Qui bien savroit logique toute Bien et mal proveroit sans doute Par bien fu cries paradis Et por mal enfers establis La tierce ars rethorique LA tierce rethorique anon Qui est droiture de raison Et ordenance de parole Quele ne soit tenue afole De cesti sont li droit estrait Par quoi li jugement sont fait Qui esgarde sont par raison En court de roi, et de baron Et fors jugie des choses males De cesti furent decretales Estraites, et decres, et lois Qui mestier ont parmaintes fois Il connoistroit et tort et droit

[initial: 9th row, opening initial /L/, 4 lines, in blue with red pen flourishing]

[initial: 18th row, opening initial /L/, 4 lines, in red with blue pen flourishing]

Et qui plus mist clergie avant Que nus qui fust, napres navant Icil prouva, tous premerains Que il nert cuns seus soverains Qui tout fist, et dont tout bien muevent Et si livre encor bien le pruevent Quil nest cons seus soverains biens Cest diex qui fist, toute autre riens Et en cele seule unite Prouva il droite trinite Son pooir, son sens, et son bien Ces .iij. claimment li crestien Pere, et fil, et saint esperit Li peres la poissance dit Et li fiex dist, la sapience Sains esperis, la bien veillance Aristotes qui vint apres Len sievi, et le tint si pres De molt de choses que dit eut Et de lui li vint ce quil seut Lart de logique, ordena bien Car plus enseut que dautre rien Li dui .iij. parsones troverent En un seul lieu, et le proverent Mais nen mirent rien en latin Car andui furent sarrazin Com cil qui furent ains le tans Jhesu crist plus de .ccc. ans Si furent tout li livre en grieu Mais puis vint boetes en lieu

[initial: 7th row, opening initial /A/, 2 lines, in red with blue pen flourishing]