Image du Monde en vers

Coment la terre se tient emmi le firmament, li. xi. capitles Por ce que la terre est pesans Plus que nus des .iiij. elemans Se tient ele plus bas emmi Et ce quest legier entor li Car com plus poise plus bas trait Et quanque poise ali atrait Por ce nous convient joindre ali Que quan quen est atrait ali Se tels chose avenir peust Quen nul lieu en terre neust Aigue, ne riens qui destornast Voie quel part que on alast On porroit aler en viron Toute la terre ou beste ou hom Sus et ius quel part quil vauroit Ausi com une mousque iroit Entor une pume reonde Ensi porroit par tout lemonde Uns hom tant com latere dure Tout entor aler par nature Si que quant desous nous venroit Il li sambleroit tout adroit Que nous fussions de desous lui Si com il nous feroit delui Car ses pies vers les nos tendroit Et sa teste vers le ciel droit Ausi comme nous faisons ci Les pies sor terre vers lemmi

[initial: 3rd row, opening initial /P/, 4 lines, in blue with red pen flourishing]

Et torne quant ele tornoie Mais por ce quil a mouvement Contre le tor dou firmament Si dirons une autre raison Sune mousque aloit en viron Une roie qui tournoiast Si que la mousque en contre alast La roie avec li lemmenroit Quancois maint tor faire porroit Que la mousque eust fait un tor Et quele eust ale entour La roie dus quau premier point Si entendes en itel point Le solail aler et la lune Par une voie quest commune A .vij. planetes quou ciel sont Qui tout par cele voie vont Tout ades devers oriant Et li ciels torne en occidant Si com sa nature le guie Mais ci fenist cele partie Por deviser de la seconde La terre de la mappemonde Et la forme dou firmament Qui dusquas estoiles sestent Ci commence la seconde partie dou livre Puis que la terrre est si petite Si com avons ici descrite Petit doit on proisier ses biens Envers le ciel, nes com fait fiens

[initial: fourth to last row, opening initial /P/, 3 lines, in blue with red pen flourishing]