Image du Monde en vers

Emmi le front cler et vermeil Sira uns autres qui le vis Et la bouche ont, emmi le pis Et .i. oeil en chascune espaule Et li nes en la bouche avale Et ont soies sor le musel Ausi com de dos de porcel Sira vers le flueve de gauge Une gent cortoise a outrage Qui ont droite figure doinne Qui de loudor daucune poume Vivent sans plus et si vont loing La poume querre a lor besoing Que se male puor sentoient Sans le poume tantost morroient Des serpens et des bestes dynde En ynde a sarpens de tel force Qui les cers deveurent a force Sira une autre beste encore Que on apele seuticorne Corne a de cerf emmi le vis Et de lion cuisses et pis Pie de cheval orailles grans Qui li croissent en lueil dedens Bouche reonde et le musel Ausi com le chief dun torel Les iels lun de lautre molt pres Et la vois dun homme bien pres Sira une autre fiere beste Cors de cheval de sengler teste

[initial: 17th row, opening initial /E/, 2 lines, in blue with red pen flourishing]

[initial: second-last row, opening initial /S/, 2 lines, in red with blue pen flourishing]

Si gemissent et font dolour Et li petit qui vont entor Mucent par desous sel soulievent Aucune fois est quil le lievent Eust sont eschape de mort Aucune fois par lor effort Mais quant nel pueent relever Si lor convient laissier ester Et sen vont gemissant ades Et cil qui sont repus empres Les prennent par lor estrumans Ensi prent on les olyphans Ou flun dynde qui a non gauges Vont les anguiles a grans renges Qui bien on .ccc. pies de lonc Et que on menjue a besoing Mainte autre beste merveilleuse A en ynde horrible et hideuse De grans sarpens et dautres bestes Qui cheviax ont et cals en testes Iluec li basilicque sont Qui si venimeus regart ont Qui dou regart daus seulement Ocient les oisiaus et gent Teste de coc, cors de serpent Nule beste, a lui ne se prent Rois est de sor tous les serpens Et sor bestes li cos poissans Il est, blans, baies, ca, et la La terre par la ou il va

Navra jamais herbe ne fruit Nes li arbre emperissent tuit Se morte a beste ou autre chose Jamais beste aprochier ni ose Sira en cele region Serpens acorne de mouton Une autre i a qua non aspis Qui ne puet estre nul jor pris Nen chantes se par dous chant non Dont il oit volentiers le son Mais quant le chant primes escoute Sa keue en ses orailles boute Que ne loie, et se trait ensus Por ce quil ne soit deceus Autres i a quont non tygris Que on prent a force tous vis Cest cil dont le triacle on fait Qui tout venim oste et desfait UNe maniere i ra de vers A .ij. bras felons et divers Que les olyphans en abatent Et tuent quant pres diaus sembatent Cil serpens vit molt longement Car quant viel et foible se sent Si se confont par geuner Et se laisse si afamer Que peu li remaint de son cors Puis se met par .i. pertruis hors Daucune piere molt estroit, Et se met outre A tel destroit, Que la pials i remaint entiere

[initial: 5th row, opening initial /S/, 2 lines, in red with blue pen flourishing] [initial: 15th row, opening initial /A/, 2 lines, in blue with red pen flourishing] [initial: 19th row, opening initial /U/, 2 lines, in red with blue pen flourishing]

[lower margin, quire number: .vj.^us]

Puis li vient autre piaus arriere Ensi reforme son aage Comme beste, qui molt est sage Serpens ira, dautres manieres Que maintes precieuses pieres En testes et en iels lor sont Maintes vertus en eles ont Des pierres dynde EN inde croist li aymans Une pierre de vertus grans Qua lui trait le fer et ramist Par la vertu qui en li gist La croist li dyamans entiers Qui ne puet estre depecies Nuses, se par sanc de bouc non Si a autres de grant renon Esmeraude, qui la veue Comforte, quant on la veue Li charboucles i est luisans Par nuit comme charbons ardans Si a saphirs, qui enfleure Ostent diels, et enflameure Thopasces, qui ont color dor Et rubyns, qui miex vaut encor Si a dautres pierres asses Qui en eles ont grans bontes Mais qui savoir vieut lor afaire Si sen voist lire en lapidaire Qui dist, lor nons et lor vertus Car ci nendirons ore plus

[initial: 9th row, opening initial /E/, 3 lines, in blue with red pen flourishing]