Page 442

XXVI. Et quant feme gage bataille, elle est en ce point meismes: et feme peut lever garent, et peut apeler de murtre.

XXVII. Et à bataille de murtre n'a que treis jors de respit. Et ce elle est de chevalier, il se deivent combatre à pié aussi come autres genz, sauf ce que, en leuc dou tanevas et dou baston, il deivent aveir une targe que on apelle harasse, et une lance et deus espées, l'une seinte et l'autre atachiée à la harasse. Et de totes autres carelle que de murtre tant soulement, se combatent chevaliers à cheval armés de totes armes, se il n'apelle sergent.

XXVIII. Et si est usage ou assise que le plus preuchein heir aparant de celui qui en la dereaine saisine dou fié fu, ce il est de celle part dont le fié muet, deit aveir celle meisme saisine, provant le parenteis dou dereain qui morut saisi et tenant de celui fié. Ne le seignor ne li peut riens dire à l'encontre qui li vaille, se le requereor peut prover par previlege ou par recort de court que le don dou conquereor ou la teneure de son ancestre ou dou dereain qui morut saisi et tenant, se celui qui devant tint le fié ne fist chose dont le fié seit perdu par assise ou par usage, ou se le seignor ne peut prover par recort de court que celui qui en morut saisi et tenant aveit eu le don à sa vie sanz plus. Et son don et s'escheete ne deit on requerre que à son seignor, ne le parenteys prover que à son seignor.

XXIX. De preuve de parenté ne d'aage n'a nul torne de bataille.

XXX. Et sis choses sont por quei les homes pevent gagier leur seignors de leur servises, jusque à ce que il ait compli leur requeste:
1° L'une si est, que se un home lige vient devant le seignor et li face aucune requeste et li requiert esgart de court, et le seignor ne li feist aveir ou ne se delivrast de lui par esgart de court meismes.
2° Ou se il avenist que l'on ne le laissast venir devant le seignor, et ensi fust deleé de venir à son dreit.
3° Ou se il avenist que la court eust fait aucun esgart, et le seignor ne le vosist tenir ne autre por lui.
4° Ou se il avenist que le seignor, ou autre por lui ou en achaison de lui, dessaisist sans esgart de court aucun de ces homes de tot ou de partie de son fié: celui qui est dessaisi peut requerre ces pers qui li aident à recouvrer sa saisine, fornissant dreit, se l'on li set riens que demander.
5° Ou se le seignor met main sur son home et le fait arester sanz esgart de court.
6° Ou c'il aveneit que le seignor congeast de son reiaume aucun de ces homes sans esgart de court, et l'ome li requeyst que il le menast par sa cort et le seignor ne le vosist faire.

XXXI. Et por chascune de ces devant dittes choses peut l'on venir à ces pers, ou, c'il ne peut venir, mander là où il les porra trover et requerre lor, par