77r

[column 1]
Iluec ou croist la mandegloire
Dont nous ferons apres memoire
la femele de lolifant
aproche lerbe maintenant
et menjue de lerbe ancois
et li malles sanz nul gabois
En menjue quant il ce voit
Que la femele le decoit
Qant ambedui en ont mengie
et ont deduit et envoisie
Si sasamblent alor afaire
Si com tex bestes doivent faire
la femele tantost concoit
et le feon quele recoit
Porte .ii. ans com dit vouz ai
Vers son terme est en grant esmai
por .i. dragon qui les espie
En une eaue mult replenie
Vait feoner por le dragon
Quil ne li toille son foon
Car se defors leaue le voit
Li dragons le devoreroit
En ces bestes por veritei
Sont eve et adans figurei
Qant il furent en paradis
En plentei et en joie assis
Ne savoient que maus estoit
Ne dont charnex deliz venoit
Mais quant eve le fruit gousta
A son segnor amonesta
Quil en menjast seur le deffens
Si furent essillie par tens
et Getei en lestanc parfont
et en grans eaues de cest mont

column 2]
En granz perilx et en tormens
Qui noier ifont maintes gens
Dont li profetes david dit
En une pseaume quil escrit
Sauve moi dex par ta merciz
Des grans perilx ou je sui mis
Car jusqa marme sont entrees
Mult granz eaues et desrivees
et en .i. vers redist aillours
Que dame diex li fist secours
Jatendi fait il mon segnor
et il moi par sa grant doucour
et mosta dou lac de misere
Dou tai et dou fiens ou je ere
Qant adans fu deseriteiz
et forz de paradis geteiz
En paine et en perdition
Dont mist sa generation
Mais nostre sire enot pitie
Por raencon de ce pechie
Espira .i. novel adan
Qui por nous traist poine et ahan
et tous nous traist a raencon
Cest toute voie ma chancon
Que ades vous chant et recort
Que par lui nous gari de mort
Icil qui dou saint pere vint
Prist char humaine et hom devint
Sor ferme pierre mist noz piez
En nostre bouche ce sachiez
Mist nouveaus chanz et nous aprist
et la sainte orison nouz dist
Que pater noster apelon
Tout ades dire la denon.

Top right corner: roman numeral foliation "lxxviii" and modern foliation in red "77"