36v

OverviewTranscribeVersionsHelp

Facsimile

Transcription

[col.1]
Dites · lun jor tost · lautre tart
& plus les prent diex asapart
Por ce averoient lun mestier
O reloge · en chascun monster
Nis les jors en vaudroient meaus
Selonc dieu · & a leur cors veaus
& plus longement envivroient
Sa .i. seul point le contenoient
Dovrer · de menger · dautre afaire
Chascuns a la droite hore faire
Si seroit ce chose legiere
Sil ivoloient leur meniere
A torner ensi com il font
A faire ce qui les confont
Cest avoirs · dont il naist envie
Dont porchacier cuident leur vie
Por assambler leur granz tresors
& il porchacent miex leur mors
Mais li grant tresor quil assemblent
Leur sens · & leur cuers si leur emblent
Qadroit ne se pucent nomer
Ne leur afaires ordener
Por vivre einsi com il deussent
Dont touz jors plus aaise fussent
& vesquissent plus longement
& augrei dieu plus sagement
Mais tant aiment gaeng davoir
Que ce qui miex leur doit valoir
Ne sai por coi lavoir conquierent
Cest laise dou monde quil quierent
Perdent il por le gaaingnier
Car qant il se cuident aidier
& estre aaise a grant sejor
Lors muerent il agrant dolor
[col.2]
Car paine de la covoitise
De lavoir ou touz jors ont mise
Toute leur entente & leur cure
Sanz ordenance & sanz mesure
Les a plus tost menez a mort
Si sont ore maint homme mort
Que se leur afaires eussent
Ordenet · si com il deussent
Chascun jor a heure establie
Qui encores fussent envie
& riche · & puissant · & fort
Einsi se hastent de leur mort
Car nature ne puet soufrir
Longement divers maintenir
Ne les soudaines remuances
Quil font par leur foles enfances
Ne adieu ne plaisent de rien
Car il nen puet venir nul bien
Plus aiment gaaing davoir faire
Que chose qa dieu puisse plaire
Ja par ordre riens ne feront
I. joꝛ matin au monstre vont
Lautre jor tart ou a tele heure
Quil cuident que tant leur demeure
Deleur autre besongne afaire
Ou trop perdre trop deleur afaire
Einsi niront ja dieu proier
Fors quant mains cuident gaengnier
& mains gaengnent il sanz faille
Car il servent dieu de la paille
& tel paille leur en rendra
Que leur paille chier leur vendra
Dont il le laissent aservir
Qen i. · seul jor leur puet merir

Notes and Questions

Nobody has written a note for this page yet

Please sign in to write a note for this page