Lambeth Palace 223

ReadAboutContentsHelp

Pages

1
Complete

1

{¶ Saynt Brendan  ¶ Saynt Dunstan } SAynt Dunstan was of Englond  of gode kyne ycore God wroȝt foȝ hym myracle  long er he was bore His moder stode wiþ child of hym  in chirche at Candelmasse And all þe parissh with her lyȝt  as custome is ⁊ was At masse men stoden with her lyȝt  riȝt as men done now Her candels quenched alle at ones  ⁊ nomon nist how Mich wonder þer was  with all þat euer þer stode How her candels were quenched  hit changide all her mode

Last edit 10 months ago by KendallB
2
Complete

2

{¶ Saynt Dunstan } So þat þai stode ⁊ speken þer of  ⁊ wondred euerychone Vppon saynt Dunstanes moder serge  þer lyȝt a fyre anon Nomon wist whennes hit come  but þurȝ goddes grace And also for hir blessed birþe  men knewe wel hit was Þat ilke lyȝt fro heuen come  as Ihesu Crist hit sende And all þe folke þat stode about  her candels þerat tende And of þat ilke holy body  þat in hir wombe was þere All Englond shule lyȝted be  wel better þen euer hit were ¶ Þo þis child born was  his frendes token hede And leten him do to glaftenbury  to norisshe ⁊ to fede To teche him his bileve  þe Pater noster ⁊ þe Crede Þat childe sone wexe ⁊ wel þrofe  ⁊ so he most nede Lytel ȝeme he toke to þe world  to godenesse euer he drogh Ych mon þat herde him speke  hade of hym ioye ynogh Þo he was in mannes witt  to his Eme con he go Þe Erchbisshop of Canterbury  aldelme þat was þo With hym he made ioye ynogh  ⁊ euer þe lenger þe more Fro þat he segh of his godenesse  ⁊ of his wiselore For daynte þat he hade of hym  he lete him soone bringe To þe prince of Englond  sire Adelstone þe kyng ¶ Þe kyng hym made ioye ynogh  ⁊ grauntes al his bone Of what þinge he wolde him bidde  if hit were to done Saynt Dunstan asked þe kyng a place  ⁊ to hit he him broȝt In þe toun of Glastenbure  ⁊ he him grucched noȝt Þe kyng him graunted his bone anon  ⁊ after him also Edmond Adelstones broþer  þat after him kyng was þo To glastenbury he ȝede soone  þe gode mon saynt Dunston Boþe þe kynges him ȝaf love  Edmond ⁊ Adelston A faire abbay he lete arere  amon sees ȝett þere stond Of blake monkes hit was made  þe first of Englond ¶ For ych abbay of Englond  þat of blak monkes is Of þe hous of Glastenburye  spronge first ⁊ come y wis Hym self he toke þe habyt þere  ⁊ first monke bicome And of þat hous was Abbot  ⁊ grete Covent to him nome And made þer goddes seruice  stidfast ⁊ stable ynogh Þe covent þat þerynne was  to all godenesse he drogh ¶ Þis holy Abbot saynt Dunstan  aght grete powere

Last edit 10 months ago by KendallB
3
Complete

3

{¶ Saynt Dunstan } With þe kyng Edmunde þat was þo  ⁊ was his counselere After kyng Edmondes deþ  agode whyle hit was gon Þat Edwyn his sone was kyng  but not after anon ¶ Þis Edwyn hade euel rede  ⁊ þerafter he drogh With saynt Dunstan he was wroþe  ⁊ þat with ful grete wogh He drof hym of his Abbay  ⁊ did hym shame ynogh Þe more shame þat he him did  þe more þis gode mon logh He drof hym out of Englond  ⁊ lete hym do fleme ¶ Þis gode mon went out gladly  ⁊ toke he neuer ȝeme To þe Abbay of saynt Gamond  þider soone he drogh And soiourned þere ful longe  ⁊ lad gode lyf ynogh And þo þe kyng Edwyn was ded  Edgar þat was his broþer After hym was made kyng  for þen þer was non oþer A ful gode mon he was  ⁊ loued holy chirche And whoso him þerto rad  after him he wolde wirche ¶ Men tolde hym of saynt Dunstan  þat his broþer drof of lond With vurȝt for his gode dede  as he con vnderstonde After hym he sent anon  þat he aȝeyn come soone And made him all his counselere  of þat he hade to done Saynt Dunstan come home aȝeyn  ⁊ fayre was vnderfonge And aght his Abbay al in pes  from which he hade ben longe With þe kyng he was ful wele  ⁊ made his counselere ¶ Hit bifel þat þe bisshop of Wircetre was dede Þe kyng ⁊ Ode þe archbisshope  þerof token rede Þe holy Abbot Dunstan  to make him bisshop þere And to have herre astate  in goddes lawe þogh hit his vnwille were Sommen asked þe Erchbisshop  of Caunterbury sire Ode Wher fore þai him sich a man made  ⁊ why his graces were so gode For he shal quod þis gode mon  after me here be Erchbisshop of Canterbury  ⁊ þat shal men ȝett se ¶ What wostow þen saide þese oþer ȝ þu speekes foly y wis My leve frendes quod sire Ode  blame ȝe me noȝt For wele I wote fro Ihesu Crist  what is me saide ⁊ broȝt Bisschop he was of londoun  saynt Dunstan siþen also Of london ⁊ of wircetre  he helde hem boþe two

Last edit 10 months ago by KendallB
4
Complete

4

{¶ Saynt Dunstan } ¶ Hit bifel þe Erchbisshop  of Canterbury was ded Þe Pope and þe kyng Edgar  þerof token her rede And made þe godemon Dunstan  Erchbisshop þere And all þat knewe his condicioun  ful glad þerof þai were ¶ Þe Cristendome of Englond  to gode astate he broȝt And helde vp holy chirche rightes  boþe in dede 7 þoȝt He ordeyned þurȝ all Englond  þat persones shulden chese To kepe hem chaste frm leccherye  or her chirche to lese Saynt Athelwold was þat tyme  bisshop of wircestre And saynt Oswald þe gode mon  bisshop of wynchestre Þese two bisshopes with saynt Dunstan  were all at oon rede And Edgar þe gode kyng  to mayntene hem as hede ¶ Þese þre bisshopes ȝede about  þurȝ out Englond Of liþer persones þai toke chirches  ne myȝt þer non with stond Her chirches ⁊ her oþer godes  clenly þis þre nome And ȝaf hem oþer gode men  by graunte of þe pope of Rome Xlviij Abbayes of monkes and of Nonnen Þai wroȝt in Englond with þe tresour  þat was of persones wonnen So þat hit was mych better sette  þen it was ere on shrewes For þere as gode men þe maystre han  men vsen gode þewes ¶ Gode were þese þre bisshopes  þat in þe tyme were þo Þe better was Englond þen for hem  ⁊ shal be euermo Dure lord ȝaf saynt Dunstan  in erþe so fayre grace Þat it bifel on atyme  he was in a priuy place His fader ⁊ his moder boþe  apertly he segh After þat þai ded were  in þe blisse of heuen on hegh Wel grete love oure him kid  as he him shewed þere So myche of his priuyte  whyle he on lyve were ¶ As he lay anoþer tyme  in his reste anyȝt He segh þe ioye of heuen  ⁊ þe place wel briȝt Angels he herde synge also  a Murye songe þerynne As men done ȝett in chirche  þer masse shal bigynne Kyreleyson kyreleyson  was þat Murye songe Þis holy mon þat herde al þis  ne þoȝt hit no þinge longe Wel aȝt he to heuen come  at his endyng day While þat he on lyf was  so mych of heuen saye Harpe he loved wonder wele  þerof he couþe ynogh

Last edit 10 months ago by KendallB
5
Complete

5

{¶ Saynt Dunstan  ¶ Saynt barnabe } A day he sete in his solace  ⁊ alay þeron drogh Þe harpe he sette to þe wal  when tyme was to ete And þo he hade wesshen  he sette him doun to mete Of heuen he couþe þenke soone  of ioye þat was þere Which a myrþe  þer was euermore  amonge hem þat þer were He sete as he were al bynome  so myche þeron he þoȝt His harpe þat henged on þe wogh  ful lytel of hit he roȝt As oure lordes wille was  þogh hit a dede tre were Hit bigan to kiþe his holy poȝt  as alle herden þere Al by hit self hit harped  a Murye Anteme y wis Men sayn hit ȝett in holy chirche  in englissh þer it is Þe sowle of halowes glad ben  þat ar in heuen so gode And shewed Ihesu Cristes way  ⁊ for him shedde her blode Þere þai ar kynges withouten ende  with Ihesu goddes sone Þis anteme þat is so Murye  as þai herden alle A fayre grace oure lord shewed  when þat a ded tre Shuld synge of þat ilke ioye  þat he shuld in be Lord þonked be þi grace  ⁊ þi myȝt also Þat þu woldest in his lyf  sich myracle for him do ¶ Þo þis holy mon hade here lyved  on erþe mony aday Him self knewe wel ⁊ segh  hit was at his endinge day On holy þoresday he sekened  as hit fel in þe ȝere He lete fette his frendes  þat to him special were And his seruauntes euerychone  he lete calle also And for ȝaf all trespas  þat þai to him hade do ¶ He assoyled hem of her synnes  ⁊ in his bedes lay And so he lay al þat day  ⁊ also on þe fryday He lete calle on þe saturday  þe monkes bifore him alle And bede hem þen haue gode day  ⁊ tolde what shuld bifalle He lete do all his ryȝtinges  ⁊ goddes body nome His soule went forþe out of þe world  ⁊ into heuen come How swete lord saynt Dunstan  þat Erch bisshop was here Þu lede vs to þe ioye of heu en  þere angels þi soule bere // Amen 

Last edit 10 months ago by KendallB
Displaying all 5 pages