Image du Monde en vers

Et com la lune est longe sus Et li solaus qui est de sus Combien de grandor chascuns a Si comme, tholomeus trova Des estoiles dou firmament Vous redirons nous ensement De lor grandor de lor hautesce Et de la terre, la baissesce De toutes vous dirons le grant Mais dou roi vous dirons avant Qui tholomeus ot anon Qui tant sot de demostroison Que tels choses vaut encerchier Et astronomie ot molt chier Si vous dirons daucuns afaires Qui ne vous seront pas contraires Soir les voles, et entendre Ains iporres aucuns biens prendre Et puis apres vous mesurrons Le monde ensi com nous savrons Or entendes, de tholomeu Et dautre gent por vostre preu Dou roi tholomeu et des autres gens li .viii. capitles Dastronomie fu soustis Tholomeus, uns rois gentis Uns des rois, tholomeu degypte Qui la terre tint maint jor quite Empluisors lieus tholomeu rent Mais ce fu cil, qui plus enseut Et des estoiles, plus enquist

[initial: 24th row, opening initial /D/, 2 lines, in red with blue pen flourishing]

[Marginal sketch of Christ crucified]

Les quaresmes, et les avens Et les haus jors, que chascun jor Doit on miex faire, por sonnor Por conquerre cele grant joie Que diex ases amis otroie Que le deservent volentiers Ce nous aprent li kalendiers Qui fu estrais, dastronomie Dont tholomeus fist samie Et plus enseut, que nus autre hom Fors adam, qui fu premiers hom Car cil toutes les .vij. ars sot Entierement, sans faillir mot Com cil cui diex fist, de ses mains Et vaut quil fust li soverains De biaute, de force, et de sens Sor tous homes, qui puis son tans Peussent estre, jor en vie Fors ihesu crist le fil marie Car sens, et force, et biaute Li donna diex, a tel plente Conques puis, nus hom tant nen eut Ne ja nara mais, puis quil seut Consenti au pechie sa femme Perdi il tant, de sens de same Que tantost devint hom mortels Qui devant son pechie fu tels Que jamais mors, ne leust point Et tuit fussent, en autel point En joie, en solas, endeduit

Alixandres en resoufri Maint travail por aprendre ausi Mais il sen ala richement Comme rois, aforce de gent Dont il ne peut mie si bien Aprendre, nen querre dou bien Virgiles, cercha, mainte terre Por raisons, des choses enquerre Tholomeus qui fu rois degypte Ne reclama, pas laler quite Ains ala par mainte contree Tant que mainte chose eut trovee Sains pols, qui refu molt preudom Ala par mainte region Por plus aprendre, et por veoir Tous les bons clers quil peut savoir Sains brandains, ne fina desrer Ades, et par terre et par mer Por aprendre, tant seulement Et vit mainte merveille grant En une isle vint lau il vit Oisiaus parlant, com esperit Qui li dirent aucune chose Dont il lor demanda la glose Si ala par mains autres lieus Tant que un lieu vit perilleus Plain de peril, et de torment Que nus ne porroit penser ens Un home ivit qui respondi Que cert judas, qui diex trai

Por ce fu monnoie establie Por soustenir chascun sa vie Quant il erroient par chemin Mais tant aimment lor parchemin Lor puans cors, et lor charoingne Outre ce que li jors ne soingne Que chascuns qui puet en retient Plus qua son vivre, nen convient Si quil porrissent apres eus Et en laissent maint besoingneus Ne furent pas por ce trovees Monnoies, por faire saudees Fors tant com por avoir son vivre Tant que la mors, qui tout delivre Enfesist ce quele deust Au plaisir dieu, quanque ce fust Et ensi plus a aise fussent Quil ne sont ore, et miex peussent Faire ce quil lor convenist Et mains pechies en remansist Mais ne sont pas si sage gens Com furent cil qui par lor sens Retroverent astronomie Que tholomeus, noublia mie Ains i estudia, mains jors Tant quil trova et seut le cors Des estoiles qui ou ciel sont Et de lor mesure, damont Dont nous parlasmes ca devant Si vous dirons, dore en avant

La grandor de la terre toute Dou ciel et dou solail sans doute Des estoiles et de la lune Qui nest pas chose atous commune Si com rois tholomeus meisme Le mesura, dus quen abysme Et le prueve encor, par raison En un sien livre qui anon Lamajestes, ce est haute oevre Or oies que il en descuevre Et ce que maint autre ont ovre Qui apres lui lont esprove De son livre ou il donna art Dou prover, par raison desgart Combien la terre a delonc entour Et despes parmi, li .xv. capitles Li phylosophe par lor ars Mesurerent de toutes pars Lemont, en haut et en viron Dusquas estoiles tout enson Dont savoir volrent, la mesure Por miex connoistre la nature Mais primes volrent mesurer La terre, et sa grandor prover Quant la tere, mesure eurent Tot entor par une art quil seurent Et prove par droite raison Si comme son fesist un tor Si la troverent en viron Dune cainture tout entor

[initial: 15th row, opening initial /L/, 4 lines, in red with blue pen flourishing]