Le Livre au Roi

CHAPITRE II.

Ici orris de quei est li rois tenus de maintenir et de garder, par dreit et par raison.

Bien sachés que li rois est tenus de maintenir et de garder et de ferme tenir tous les dons des autres rois et des roynes et des barons dou reaume des dons qu'il ont fait en leur dreis que il ont au reaume, tout enci come leur preveliges diront, seelés ou de plomp ou de cire; por ce que les preveliges dou roi ou des barons soient si leaus come estre devent, et o la garentie des autres homes liges: car don de roi ni de roine ni des barons dou reaume ni des terriers qui don fassent par prevelige , ne deit valer sans la garentie des homes liges dou reaume meysme. Et encores fust ce que le prevelige fust ceelé et n'i eust tel garentie com est dite desus, si juge la raison que celuy don ne vaut, senon tant que celuy ou cele vivra qui celuy don douna , et ce est droit et raison par l'assise.

CHAPITRE III.

Ici orrés quel poer a li rois de douner el sien propre et de non douner ès choses de ses homes sans leur otrei.

Bien sachés que li rois et la royne a poer de douner fiés et terres et vignes et casaus as gens dou ciecle por Dés, o servise et sans servise; et peutbien faire

LE LIVRE AU ROI. 609

tans homes liges come il vora et pora, et bien peut aquiter à ces homes liges le servise que il li deivent, et jà nel lairra por nuluy, car ce est raison si come seignor peut et det taire dou sien propre. Mais se li rois ou la royne voisist douner aucun don ou tenement d'aucun de ses barons ou de ces terriers , la raison juge qu'il ne le peut faire par dreit, se celuy qui est seignor de celuy tenement ne l'otreie par sa volenti, si qu'il meysmes par reconnoissance de celuy otrei, saela le prevelige de son seau propre ou de plomp ou de cire s'il autre n'aveit, le don que li rois fist sur son fié ou sur son tenement. Et sil nel saelet de son ceau propre, si com est dit desus, mais li rois meysmes qui fist le don, le seela de son ceau , la raison et le dreit comande que celuy don ne vaut par dreit , ne jà nel tenra le seignor dou leuc ni ses heirs, senon tant com leur plaira, por ce que ce est chose de force sans raison et sans le dreit establissement de l'assize.

CHAPITRE IV. Ici orrés quant li reaumes meut de par la royne, et li rois ses maris fait aucun don en la terre, et quel don vaut et quel don i a qui ne doit valer, encor soit ce que li rois Tait fait.

S'il avient que li rois soit mors et est remese la royne de par cuy li reaumes meut, et puis avient que la dame prist autre mary aucun haut home, si com li afiert , par le conceill de ces homes liges, bien sachés que la raison juge et cou-mande enci à juger que nule don que celuy roi done, ne doit estre tenus après sa mort , se la royne sa moillyer ne l'otroie par la garentie de ces homes liges meys- mes; car se elle l'otreie, si com est dit desus, si que l'otroiance d'ele parole au prevelige, si doit estre ferme et estable par tot; mais se elle ne l'otrée, si com est dit desus, et encores soit ce que li rois ses maris en ait fait prevelige à celui ou à cele à cui il a fait seluy don et ceelé dou ceau reau , si ne deit valer celuy don par dreit ne par l'assize.

CHAPITRE V. Ici orrés la raison à qui deit escheyr li reaumes , ou as anfans dou premier roi ou as anfans dou segont roi , et quel don vaut dou baillage c'on tient , tant com seluy n'est d'aage por qui l'on tient celuy baillage dou reaume.

S'il avient que la royne qui veve estoit remese et avoit pris autre mary et li estoient remés anfans dou premier mary fis ou filles, la raison juge que après la mort de la roine lor mere , la reauté eschiet au plus ainsnés de ces fis dou pre-

mari, et se elles sont filles, si vient la reauté à la plus ainsnée, et à celuy ou à cele sont tenus les homes liges de faire homage et ligesse, chascun si come il deit ; et deit remaindre le baillage de la terre en la main dou plus prochein parent ou parente que les anfans aient de par leur mere de par qui la reauté meut, ou au plus prochein parent des anfans de par leur pere, se li reaumes meut de par luy; et ce est dreit et raison par l'assise.

CHAPITRE VI. Ici orrés la raison dou segont mary, ce est dou segont roi, et de ces anfans.

Encement s'il avient que la royne n'ot nul anfant dou premier mary, ou en ot, mais ne vesquirent mie longuement, et elle ot puis anfans dou cegont mari qui ves quirent, la raison juge que après la mort de la rayne leur mere, de par qui muet celuy reiaume , la reauté si vient au plus ainsné de ces anfans, si come est dit desus; et si tost come il sera en Taage de douse ans, si det estre courounés ou en Jeru salem ou dedens Sur; et si juge la raison que li peres deit aver le baillage dou reaume et de ses anfans, jusque li plus ainsnés soit d'aage de justiser et de gou verrier son reaume. Et bien sachés que tous les dons que li rois ses peres donra come son fils ou sa fille ne sera d'aage, qui est heir dou reaume, si juge la raison qu'il sont fermes et devent estre tenus par tout , par ce que la garentie des homes liges y soient en tous les dons que il fera. Mais puis que li heir dou reaume sera d'aage , jà soit se c'on ne l'ait courounés encores ne fait homage ses homes , si ne deit estre ferme, ni ne det valer nul don que li rois ses peres done au reaume ne ceele de son ceau , por ce que la raison coumande que puis que le seignor a dreit aage et qu'il a recounoissance et de bien et de mal, nul don ne peut hom douner sur sa dreiture por luy, por ce que c'il li plaist, il meysmes peut bien douner sans faire autre doner por luy ; et por ce coumande la raison et l'assise que ce li fis veut , par dreit nul don ne sera jà ferme que ces peres ait douné sur son reaume despuis qu'il a esté d'aage , ce ses fis proprement ne mist son ceau de ces coins. Mais se ces fis qui estoit heir dou reaume , mist son ceau en ceaus dons que ces peres fist , la raison juge et coumande se enci à juger que ceaus dons sont ferme et estables, tout enci come li dons est dounés, jà soit ce que li peres eust seluy don dounés là où il estoit d'aage, si est ferme et estable par dreit et par raison et par l'assize.

CHAPITRE VII. Ici orrés la raison dou roi qui est em prison de Sarasins, et di quei sont tenus ces homes liges vers luy de faire , et c'il ne le font, si sont deserités de leur fiés à tousjorsmais. S'il avient, par aucune mesaventure, que li rois soit desconfis en bataille et que Turs l'aient pris et retenu en prison , et puis avient que li rois fait tant parler as Turs que il metent à raenson par pris fait , et il mande à la roine et à ces homes liges qu'il porchassent sa raençon , et il ne pevent , por ce que il ne treuvent qui tant leur preste, et li rois s'acorde o les Turs de bailler leur en hostage por luy de ces homes liges tant qu'il se tienent por paiés, en jusques il or ait porchacé lor raenson : la raison juge et comande ce enci à juger, que se li rois mande à ces homes liges par nom à tant com li Turs se sont acordés o luy de prendre, qui li veignent à luy por entrer en hostage por luy, tant qu il ait porchassé sa raenson, il sont tenus par dreit d'aler iqui et de entrer en ostage por leur chief seignor par dreit, en jusques à tant qu'il ait porchassé sa raenson. Mais se il avenoit qu'il i eust aucun de ces homes liges qui ne vosist entrer en ostage por son seignor, la raison juge celuy et coumande qu'il enci juge, ce est qu'il det estre tout premier deserités de tout can que il tenoit el poer dou roi par tout son reaume, et deit aver perdu respons deceort à tousjorsmais, si que mais ne det estre pris en garentie de nule riens, ni ne poret par dreit nul chevaler lever par bataille, por ce qu'il menti son homage et sa fei au besoing à son droituryer seignor en terre; et ce est dreit et raison par l'asise dou reaume de Jerusalem.

CHAPITRE VIII.

Ici orrés la raison dou roi qui est mout endetés et n'a de quei paier sa dette ne gage que il bailie à son acreour don il se tenist por paié , et se que il peut faire de ses homes liges par dreit.

S'il avient que par aucun besoing dou reaume ou por forniment de sa terre ou de ses homes , li rois ait emprunté d'aucun haut hom de sà la mer Crestien une grant cantité d'aver et de besans, et il avient que li rois n'a de quei paier son acreour ni n'en a gage qu'il i peusse bailler, que celuy veulle jà prendre, et li rois li a proumis par sa fei que c'il ne l'a paié au terme qui mis est entre aus deus qu'il li baillera tant de ses homes liges en hostages en son poer, por seurté de sa terre, qu'il s'en tendra por paié : la raison juge que quant il vendra au terme, c'il n'a de quei paier ne gage que donner que celui veille prendre , que li rois peut bien bailler à celuy tant de ses homes liges qu'il se teigne por paié, en jusques au termequ'il le det aver paié; et ces homes liges sont tenus de demourer en la prison de

612 ASSISES DE LA HAUTE COUR.

l'acreour par leurfei, en jusques à tant que leur seignor l'ait paié; et c'il ne la paié au dit terme, quant il li bailla ces homes liges en gage, la raison juge et coumande que celuy acreour a bien poer, puisque li termes est passés qu'il n'en est paiés et le dut estre, de vendre gage abandon et fiés et maisons et can que ceaus ont qui tient en gage por sa dette, et paier sei de se que le seignor li devet. Et puis qu'il sera paiés, si est tenus de delivrer au roi ses homes liges qui li bailla par dreit. Mais c'il avient qu'il i ait aucun home lige qui ne voisist entrer en cele gagiere por son seignor, la raison juge qu'il det estre deserités tout enci com est dit desus en l'autre jugement, car ce est droit. Et bien sachés, que par dreiture de fei et par l'assise, li rois est tenus, en toutes guises, se li onques peut sans faire trop grant meschief dou renom de la courone , de delivrer ses homes dedens celuy an et celui jor qu'il entrerent en la prison ou en l'ostage por luy. Et si est li rois tenus par dreit de donner à ces homes, tant come il seront en la prison ou en l'ostage por luy, à bevre et à manger et à vestir, ce il a sauvé les rentes de leur fiés por quei il deivent l'omage et la ligesse ; et ce est dreit et raison par l'assise de Jerusalem.

CHAPITRE IX.

Puis que vous avés oy la raison et le poer dou roi, si coumande le dreit que vos oiés la raison et le dreit de quei est tenus le mareschaus dou reaume , de servir au roi , et qués est son office de la mareschaussié par dreit.

Bien saches que l'office dou mareschau dou reaume si est que il deit estre tout premier hors au cri, o la baniere reau, por arenger et por destenir les gens de la terre qu'il ne voisent folement et se perdissent par malegarde, et puisque li rois est venus hors ou celuy qui seroit en son leuc, si deit le mareschau ordener ses eschielles et des chevalers et des tricoples, segont ce que miaus li en cemblera. Et si sont tenus par dreit les chevalers et les trucoples d'obeyr tous le couman dement au mareschau, ni ne se deit meuvre nule eschielle ne poindre sans le congé dou mareschau ni torner arieres. Et le mareschau est tenus, si tost com il avera ordené les eschielles , de venir devant le roi por oyr et por entendre sa volenté et son coumandement, et se que li rois li coumandera ou de poindre ou