41v

[Col. 1]
Ainz ala par mainte contree
Tant que mainte chose ot trovee
Sains polx qui moult refu prendons
Rala par maintes regions
Por aprendre · et por plus veoir
Touz les bons clers quil por savoir
Sains brandains ne fina derrer
Ades · et par terre et par mer
Por aprendre tant seulement
Et vit mainte merveille grant
En une ille vint · ou il vit
Oisiaus parlanz com esprit
Qui li distrent aucunes choses
Dont il leur demanda les gloses
Si ala par mains autres liens
Et vint en ·I· si perilliens
Plain de peril et de tormens
Qui nus ne porroit penser qens
Aucun vit qui li respondi
Qui ciert vidas que dieu trai
Qui cent foiz tormenteiz estoit
Le jor · ne morir ne pooit
Maint autre grant merveille vit
Si com en sa vie est escrit
Maint autre qasseiz de biens sorent
Cercherent le monde ou quil porent
Por miex quenoistre mal et bien
Si neses[p]erargnoient de rien
Ne voloient pas si tost croire
Chose quil ne trovassent voire
De qanque li livre disoient
Jusqatant qesprovei lavoient
Por mex dieu quenoistre · et amer
Ainz cerchoient et terre et mer