BnF. Département des Manuscrits. Français 14964

Que tost nel coviegne morir Tost i est devenus pourris Son laigue nest ades norris De nous vous di tout autresi Manoir ne porriemes ensi Ne vivre en air esperitel Tant com nous aions cors mortel Comment li .iiii. element sont assis Cele clarte dont dit avon Qui airs esperiteus anon Dont li angle prennent ator Environne trestout entor Les .iiij. elemens que diex fist Et lun par dedens lautre assist Cest feus, et airs, et aigue, et terre Dont li uns en lautre se serre Et li uns lautre ensi soustient Que la tere enmi lieu se tient Li feus qui est premierement Enclost cel air outreement Et cis airs enclost laigue apres Qui de la tere se tient pres Tout ausi com on voit le luef Que laubuns enclot le moiel Et enmi le moiel sa baisse Une goute ausi com de craisse Qui de nule part ne se tient Et la craisse qui le soustient Ne li touche de nule part Ensi est par itel regart

[initial: 10th row, opening initial /C/, 2 lines, in red with blue pen flourishing]

La terre emmi le ciel assise Et si igalment ainsi mise Quainsi est en haut com embas Est assise par droit compas Car tout emmi le sie^cercle est mise Cest adire ou plus bas assise Car de tout le mont acompas Est li poins emmi li plus bas Ensi sont li quatre element Li uns en lautre entierement Si que la terre est toute emmi Quautant a li ciel de sous li Tous jors com ele a par desus Ceste figure en moustre lus

[image: diagram of concentric circles representing the arrangement of the four elements, the central one painted light brown (labelled in black: TIERE), the next painted green (labelled in white: C E S T . E U ? E), the next painted blue (labelled in white: C E S T . A I R S), and the outermost painted red (label in white: C E S T . F E U S). The whole damaged, making the zone for water difficult to read]. [NB: "l" in third word, second line is dotted, final s of line 5 is dotted; meaning unclear]

Coment la terre se tient emmi le firmament, li. xi. capitles Por ce que la terre est pesans Plus que nus des .iiij. elemans Se tient ele plus bas emmi Et ce quest legier entor li Car com plus poise plus bas trait Et quanque poise ali atrait Por ce nous convient joindre ali Que quan quen est atrait ali Se tels chose avenir peust Quen nul lieu en terre neust Aigue, ne riens qui destornast Voie quel part que on alast On porroit aler en viron Toute la terre ou beste ou hom Sus et ius quel part quil vauroit Ausi com une mousque iroit Entor une pume reonde Ensi porroit par tout lemonde Uns hom tant com latere dure Tout entor aler par nature Si que quant desous nous venroit Il li sambleroit tout adroit Que nous fussions de desous lui Si com il nous feroit delui Car ses pies vers les nos tendroit Et sa teste vers le ciel droit Ausi comme nous faisons ci Les pies sor terre vers lemmi

[initial: 3rd row, opening initial /P/, 4 lines, in blue with red pen flourishing]

Et sil aloit ades avant Droit devant lui en iroit tant Quil revenroit au lieu premier Dont il se prist a eslongier Et ala premiere estature Ou il fust ainsi par nature Que deus hommes se deseurassent Li uns de lautre et sen alassent Li uns ades vers orient Et li autres vers occident Si quandui iugaument alassent Il converroit quil sen tornassent De sor le lieu dont il sesmurent Et puis la ou premerain furent Si revenroient par devant Andui ausi comme devant Car lors aroit cascuns un tor Fait par desous trestout entor Ausi com entor une roie Qui aterre se girroit coie Ensi entor la tere iroient Concil qui ades se trairoient Droit vers le milieu de la terre Car tous pois devers si se serre Et que plus poise plus si trait Et plus pres dou milieu se trait Car quant plus cave la dedens Tant trueve on terres plus pesans Por entendre ces aleures Poes veoir ces .ij. figures

Et se tenroit tout environ Lune et lautre por prendre lieu Chascune devers le milieu Seles estoient dun seul pois Si venroient a une fois Ausitost lune comme lautre Car nature nen feroit autre Cascune vers lautre venroit Si com il pert ci orendroit

[image: diagram with the earth shown as a circle painted light brown and divided into four quadrants by a blue cross. At the ends of the cross are four figures, the uppermost sitting, and the others walking to suggest movement in an anticlockwise direction. The whole encompassed by another circle, painted blue (label in white: A I R S]

Et se lor pois igal estoient De lor pois quant eles cherroient Cele qui plus pesans seroit Plus tost vers lemmi setenroit Et les autres tout entor li Si com cestre figure ci

[Image: diagram of the earth shown as a circle, painted light brown and divided into four quadrants by a blue cross, surrounded by a second circle painted blue (labelled in white: + C E S T L I A I R S)]