BnF. Département des Manuscrits. Français 14964

Tant endist, icil philosophes Et tant en redist aristotles Qui fu ses clers, que ce estoit Principes, que vertu dounoit Es choses destrer et movoir Et cui diex dona tel pooir Si com on voit quant riens se muet Qui estre et movoir se puer* Maint livre de nature enquist Aristotles, qui ce endist Puis endirent autre pluisor Que ce est vertus de chalor Qui fait estre chascune chose Si nen dirai ore autre glose Sil en sievirent miex platon Que aristotle en sa raison Ensi endirent lor samblant Et asses endirent autant Selonc ce que on empuet dire Car ce ne puet nus contredire Mais nus nentent bien que ce soit Fors diex qui tout oit et tout voit Qui premiers le vaut establir Por toutes choses acomplir Si puet on bien par ce savoir Que molt est diex, de grant pooir Et molt est grans, chose de lui Quant tel chose fist sans anui Qui est de si poissant afaire Por ce vaut il meismes faire

[* scribal error, should read "puet"]

Lomme que il fust li poissans Et quil est en li tel sens Que en lui par nature eust Chose qui grever li peust A lame, et en vers dieu nuire Il se peut bien en si conduire Se bien veut son cuer alever Que nature nel puist grever Por ce furent les ars trovees Por oster les males pensees Qui pueent lomme amort conduire Car par les ars les peut destruire Ensi puet muer son mal estre Par ensengnement de bon mestre Por ce fait bon estre o les biens Con aprent afaire les biens Si est sages, qui son preu fait Si qua pres sa mort miex en ait Et si que diex le tiegne apreu Si avra fait, plus de son preu Que de lautrui ce sache il bien Car il en avra tout le bien Et faus est qui le cors tant aimme Quil en oublie asauver lame Que diex por ravoir li presta Et il fait tant que maufes la Il fait si com li maux sergans Cui li sires presta besans Por aus monteplier embien mais il ne le fist mie bien

Com cil qui fu de male foi Dont chacies fu, ensus de soi Naim puis neut fors reproche et honte Si com leuvangiles raconte Ensi sera de ciaus sans faille Qui le grain laissent por la paille Comme cil qui laissent porrir Lame por faire lor desir De lor cors dont toz max lor niast Mais atant li contes se taist Ici des ars, et de nature Por deviser, de la faiture Dou monde comment il est fais Par nature et de dieu portrais Qui par son saint commandement Fist le monde, et ce qui apent Et tout fu fait ason devis Or oies que je en devis De la forme dou firmament li .ix. capitles Diex forma tout reont le monde Com une pelote reonde Le ciel reont de toutes pars Qui entor le monde est espars Entierement, sans desevraille Tout autresi comme lescaille Deluef quentor lAubun sadonne Tout ausi li ciex avironne Uns ars qui est sor celui air Qui en latin anon ether Cest adire purs airs et nes

Car de pure purte fu fais Cil airs ses joist nuit et jor De perpetuel esplendor Et est li clers et si luisans Que suns hons i estoit manans Il verroit tout, et un et autre Quanquil a de lun chief alautre Ausi ligierement ou plus Com on porroit veoir ca jus Devant ses iex un petit loing Son en avoit tres grant besoing Ensi vous di qui la seroit Tout partout veoir i porroit Asi bien de loins com depres Tant est cis lieus et nes et clers De celui ether lor cours prennent Li angle et lor eles empennent Quant en tere vienent tramis A ciaus cui diex tient por amis Quant il lor vieut riens demostrer Et por ce samblent il si cler Que li oeil domme pecheor Ne pueent soufrir lesplendor Ne regarder cele clarte Com cil qui plain sont doscurte Cest adire plain de pechie Dont il ont este entechie Si en est sovent avenu Quant li angle estoient venu A aucun homme en aucun lieu

Por noncier la volente dieu Quausi com endormis chaoit Tandis com la parole ooit Delangle ausi come ensongant Et estoit tout mus dusquatant Que li angles sen repairoit Lors li preudom se resveilloit Qui bien se ramembroit doudit Que li angles li avoit dit Ausi vous di certainnement Nus ne porroit corporeument Soustenir en nule maniere De cele clarte la lumiere Qui pres est dou saint ciel lassus Dont nous sommes si mis ensus Ne riens corporeus ni porroit Soustenir soi en nul endroit Puis quele fust de riens pesans Ne nus oisiaus tant soit volans Ne si porroit ja soustenir Quaval nel convenist venir Tout droit ausi com une pierre Dusqua cel air entel maniere Ou son voler porroit reprendre Se hastiex nestoit dou descendre Car nus demorer ni porroit Sesperiteus chose nestoit Ne point ni aroit de son vivre Nient plus que li poisson puet vivre En cest air, ne lui soustenir