BnF. Département des Manuscrits. Français 14964

Et por ce que toutes les gens Ne seuent par tout ce que monte Alongerons un peu le conte Por faire entendre quest nature Por miex entendre la faiture Dou monde quapres vous dirons Sentendre voles les raisons De nature comment ele oevre, et que cest li viii. capitles DAmediex fist premiers nature Cest par quoi toute riens dure Qui desous ciel soit ordenee Et par li vit toute riens nee Sans nature ne puet riens estre Por ce la convint primes estre Les gens nourist, les gens saisonne Et la ou diex veut la se donne Tous jors oevre diversement Nature fait tout ensement Com fait la hache au carpentier Quant il oevre de son mestier La hache trenche et la sen vient [ ] Ou cil la dresce qui latient Par la hache est luevre assevie Et faite selonc samaistrie De la maniere de louvrier Qui de matere a recouvrier Tout ausi nature se donne La ou diex veut et abandonne Car par lui est toute riens faite Si com diex la avant portraite

[Initial: 9th line: 4-line red initial /D/ with blue penwork decoration]

En li le fait, si oevre diex Sen lun faut, en lautre est requiex Nature ne fait riens en vain Na nule riens fors tout son plain Ades est la sienne oevre entiere Selonc ce que trueve matere Soit embestes ou soit en gens Tous jors est ses afaires gens Comme cele qui ne fait riens Qua dieu soit contraire de riens Ou matere faut, si laisse oevre Et com plus en i a, plus oevre Si com on voit aucunes bestes Que lune si naist a .ij. testes Ou a .vi. pies y a mains membre Que sa forme ne li ramembre De teus voit on sovent issi Que li un sont pres defailli Et li autre sont eureus De lor fruit, et plenteureus Tout ensi revoit on sovent Avenir a aucune gent Quant il naissent atot .vi. dois Li autre a .i. ou .ij. ou trois Ou uns membres, entout lui faut Bras ou jambe, dont il pis vaut Selonc ce capartient au monde Et a un autre, li rabonde Encors ou en membre autre chose Que forme humainne li pose

Ou il li faut, empies, en mains Sovent naist a plus ou amains Jambe ou bras, plus lonc de lautre Si ravient tout el, a .i. autre Quil est noirs, et li autres blans Li uns petis, li autres grans Li uns devient preudom et sages Li autres plains, de maus usages Li uns jones sages devient Et en viellesce, faus devient Li uns est sages, viex et jones Li autres faus en tous essoines Li uns cras, et li autres maigres Li uns maus sains, lautre halegres Li uns grailles, li autres gros Li uns vistes, li autres mols Li uns targaus, lautre hastis Li uns coars, lautre hardis Li uns boisteus, lautre bocus Li autres bien fais entous us Uns grans hons est maufais sovent Et uns petis, a lecors gent, Quil na membre, qui li defaille Et qui bien naist, la droite taille Tant com ason cors apartient Biax enfes lait, sovent devient Et li lais sovent devient biaus Li uns vient, molt de ses aviaus Et li autres en vient petit Chascuns a le sien a petit

Uns petis hom, un grant engenre Et uns bien grans sovent .i. menre Bien petis hom emprent grant chose Que uns plus grans emprendre nose Li uns meurt tost, li autres tart Tant que par a aige sempart Dou siecle tant comme nature Par volente de dieu li dure Si revoit on sovent en gent Que li uns a clergie aprent Et li autre a autre mestier A fevre ou a carpentier Ou a autre ou il met son tans Chascuns semet selon son sens Na autre ne se saroit mettre Dont il se seust entremettre Si bien comme de celui fait Ou sa nature plus li trait Si rest .i. autre dautre afaire Ou miex se set mettre et atraire A pluisours choses aservir Cuns autres ne porroit furnir Car sa nature nel doit pas Luns bee en haut, et lautre embas Si voit on que sovent avient Que la ou li hom bee avient Et autre fois nen vient achief Ains li torne tout ameschief Si quapainnes puet on sommer De rien quil vueille afin mener

Uns autres achieve maint afaire Dont nus autres ne puet rien faire Tant a en gent diversete De faiture, de volente Com ne porroit trouver en terre .ij. hommes tant seust on querre Qui si part tout sentresamblassent Quil ne se diversefiassent De membres, decors, ou de vis Ou de sens, en fais, ou en dis Tant est diverse sa poissance Quil nest riens quen li ait naissance Quil nait en li aucune riens Dont une autre, na en li riens Ja soit ce que nule desoivre Ni peust nus hom apercoivre Tele est la vertus de nature Ou maint bon clerc, ont mis lor cure A ce quil peussent, descrire Comment il peussent, miex dire Que fust nature, et plus briement Sen dist platons, premierement Qui fu de plus grant renommee Cest poissance, en chose entree Qui samblant, par samblant fait naistre Selonc ce que chascuns puet estre Si puet on bien, par ce entendre Par un homme cun autre engendre Par bestes, plantes, et semences Qui naissent selonc lor samblances