BnF. Département des Manuscrits. Français 14964

De cestes sont li chant estrait Qui en sainte eglise sont fait Toute acordance et estrument Qui ont en aus acordement Qui de musique a la science De toute riens fait acordance Toute riens qui de bien se painne A concordance se ramainne La septisme ars astronomie LA septisme est astronomie Qui est foⁱns de toute clergie Ceste ensaigne raison a querre Des choses dou ciel et de terre Qui par nature faites sont Ja si lontainnes ne seront Quastronomie saroit bien Raison seroit en toute rien Diex fist toute rien par raison A chascune donna son non Par ceste art fu primes enquise Toute autre science et emprise Et decreis, et divinites Par quoi toute crestientes Est convertie adroite foi De servir dieu le souvrain roi A cui tous biens le donne et lie Et fist toute lastronomie Et ciel et terre et les estoiles Comme cil qui est li drois voiles De tout le monde gouverner

[initial: 10th row, opening initial /L/, 4 lines, in blue with red pen flourishing]

[lower margin, quire number: .iij.^us]

Ne riens ne puet sans li durer Cest li haus astronomiens Car il set tout et maus et biens Com cil qui fist astronomie Con soloit tenir por amie Car cest une ars de molt noble estre Qui bien sages emporroit estre Et est la science qui soit Par quoi on connoist plus adroit Comment li mons est compasses Et dautres choses molt asses Par li seule furent trouvees Les autres .vi. devant nommees Et sans eles nul ne porroit Savoir astronomie adroit Tant fu sages, et poestis Ausi com hache ou autre ostis De machon on de carpentier Sont estrumant a son mestier Par quoi il fourme sa maistrie Tout ausi par droite maistrie Sont les autres .vi. estrument Dastronomie et fondement Et par lor sens et lor maniere Li preudomme ca en arriere Roi, duc, et prince et grant signor Metoient trestout lor labor A savoir les ars de clergie Por entendre astronomie Tant quil ensavoient lor part

Car il savoient par lor art Selonc la volente devine Maint grant afaire et maint covine Qua venoient donc par le monde Si ne prisoient pas une onde Qui par laigue sen vait saillant Tant que toute vait defaillant Les choses quen terre veoient Com cil qui la raison savoient Si estoit coustume acel tans Nus qui fust sers a autres gens Ne nus bas hom ne nus vilains Tant fust de grant richesce plains Nosoit riens des .vij. ars aprendre Por les gentiex qui tout entendre I voloient li principal Que franc fussent et liberal Si lor mirent par tel raison Les .vij. ars liberaus anon Et adroit car si franches sont Que lame toute franche font Et sont si adroit ordenees Et si entierement dounees Com ni puet riens laissier ne metre Tant sen feust on entremetre Por chose con i tresmuast Que toutes nes desfigurast Eles sont li faites adroit Que riens ne puet muer lor droit Nus hom qui soit en tout le monde

Tant soit de science parfonde Paiens, Juis, ne crestiens Ni pueent contrester de riens Qui les .vij. ars adroit saroit En toutes lois creus seroit Car nus ne les puet contrester De chose que vueillent prover Par raison vive proveroit Quanquil navroit qui les saroit Si est faus qui cuide savoir Adroit nule chose de voir Qui a clergie sa partiegne Por nule chose quil aviegne Se par miracle navenoit De dieu qui tout faire porroit Se des .vij. ars ne set ancois Car toute ne li navroit .i. pois A ce quil peist riens moustrer Ne faus, ne, voir, ne droit prover Car en toutes lois sont creues Par tout ou eles sont leves Nus nest tant soit de loi diverse Que sil entent ou gent converse Mais quil sache riens des .vij. ars A droit ne prover de lor pars Et nule riens de lor usages Quil ne soit creus comme sages Ne ja ne sera si paiens Que nus juis, ne crestiens Le peust de riens contredire

De chose que il vausist dire Ne sont pas lois ne decretales Quautres gens tenroient amales Les contructions qui isont Que il entriaus tienent et font Toutes lois au .vii. ars se tienent Toutes les croient et retienent Ou il agens qui rien ensachent Car toutes raisons si atachent Par tous lieus en toutes saisons Sont ades voires lor raisons Ne sont pas sciences muables Car tous jors mais seront estables Si aront tous jors grant mestier Ci laisserons deles estier Puis quoi aves ca devant Lor estre, et lor convenant De lor sens et de lor afaire Si vous devons apres retraire De nature, et que cest briement Que diex cria premierement Ains quil fesist nule autre rien Ne que mons appareust de rien Si endevons premerains dire Por miex le monde apres descrire Car ele muet le firmament Et toute riens ca mouvement Les estoiles muet et fait luire Quanquele vieut et naistreet vivre Par li se muet li firmamens