BnF. Département des Manuscrits. Français 14964

Et ses fils, li biaus absalons Et a sa force, cest la fins Fu compares, sanses fortins Ensi furent ces .iij. vertus En adam, et encore plus Car plus parfaitement les eut Que nus des .iij. et molt bien seut Toutes les .vij. ars de clergie Miex que nus, qui ainc fust en vie Com cil cui diex les eut aprises Puis furent dautres gens aquises Qui deles savoir grant painne eurent Por le deluge, que il seurent Qui devoit avenir au monde Par feu, ou par aigue, parfonde Comment on sauva clergie par le delugue li .ix. capitles PUis adam furent mainte gent Qui des .vij. ars, seurent lassent Que diex lor envoia, en terre Dont i ot aucun, qui enquerre Vaurent que li mons devenroit Ne se jamais de fineroit Si troverent, tout sans faillir Quil devoit par .ij. fois fenir A lune fois, par feu ardant Et lautre par aigue molt grant Mais ne vaut diex a cele fois Com seust, par le queil ancois Daigue, ou defeu ardant, si eurent Pitie de clergie, quil seurent

[initial: 16th row, opening initial /P/, 5 lines, in blue with red pen flourishing]

Qui ensi seroient peries Seles nestoient, garandies Lors se penserent, de grant bien Si comme cil, qui seurent bien Qua pres le premier, finement Seroient encor autre gent Si firent grans, coulombes faire Si grans que il peurent portraire Et taillier, en chascune pierre Au mains une des ars entiere Si quas autres fussent communes Dont aucun dient, que les unes Furent dune piere si dure Comme marbre, et de tel nature Quen aigue ne puet empirier Ne croistre, ne amenuisier Dune fort maniere de tieules Entieres sans nules jointures Furent les autres selonc terre Qui feus, nes peust de rien malmetre Grans coulombes eut que cil firent Ou les ars entaillies mirent Si que cil qui apres aus vinrent Les trouverent, et les aprirent De cials qui troverent les clergies Apres le delugue li .x. capitles ENsi sauverent les clergies Cil cui diex les eut ensengnies Tant que diex enterre, envoia Le delugue, qui tout noia

[initial: 25th row, opening initial /E/, 4 lines, in blue with red pen flourishing]

Fors noe quen larche se mist Par cui li mondes, se refist Lors commencierent, a refaire Lor maisons, et lor autre afaire Mais molt rudement, les faisoient Comme cil qui petit savoient Petit seurent, que faire durent Tant que les clergies, refurent Retrovees, si seurent miex Ce que bon estoit alor eus Et de lor maus trover refuge Mais li premiers, puis le deluge Qui sentente en clergie mist Et dou retrover, sentremist Cefu sera, uns fiex noe Qui son cuer eut a ce voe Et tant i usa de sa vie Quil retrova, dastronomie Une partie, par son sens Et puis revint sains abrahans Qui en retrova, grant partie Puis furent autre qui lor vie I userent, au miex quil peurent Tant que des .vij. clergies reurent Les principes, et les raisons Apres vint li sages platons Li soverains, des philosophes Et ses clers eut nom aristotes Cil platons fu li hom ou monde De plus grande clergie parfonde

Et qui plus mist clergie avant Que nus qui fust, napres navant Icil prouva, tous premerains Que il nert cuns seus soverains Qui tout fist, et dont tout bien muevent Et si livre encor bien le pruevent Quil nest cons seus soverains biens Cest diex qui fist, toute autre riens Et en cele seule unite Prouva il droite trinite Son pooir, son sens, et son bien Ces .iij. claimment li crestien Pere, et fil, et saint esperit Li peres la poissance dit Et li fiex dist, la sapience Sains esperis, la bien veillance Aristotes qui vint apres Len sievi, et le tint si pres De molt de choses que dit eut Et de lui li vint ce quil seut Lart de logique, ordena bien Car plus enseut que dautre rien Li dui .iij. parsones troverent En un seul lieu, et le proverent Mais nen mirent rien en latin Car andui furent sarrazin Com cil qui furent ains le tans Jhesu crist plus de .ccc. ans Si furent tout li livre en grieu Mais puis vint boetes en lieu

[initial: 7th row, opening initial /A/, 2 lines, in red with blue pen flourishing]

Uns grans philosophes et sages Qui aprist, de pluisors langaiges Et qui droiture, molt ama Cil de lor livres translata Grant partie, et mist en latin Mais il vint ancois asa fin Quil les eust translates tous Dont ce fu, damages anous Puis en ont autre translate Qui furent bon clerc, et letre Mais cil entranslata, le plus Que nous aions encore eus Et fist maint bon livre en savie De molt haute philosophie Qui encor nous ont bon mestier Por nous en vers dieu adrecier Maint autre bon clerc ont este Au monde de grant poeste Qui aprisent toute lor vie Des .vij. ars et dastronomie Dont aucuns i eut qua lor tans Firent merveilles, par lor sens Mais cil qui plus sen entremisent Fu virgiles qui tant en fist Por ce si vous en conterons Aucunes dont oi avons Des mervelles que virgiles fist par astronomie li .xi. capitles Devant jhesu crist fu virgiles Qui les ars ne tint pas aguiles

[initial: 29th row, opening initial /D/, 4 lines, in blue with red pen flourishing]