BnF. Département des Manuscrits. Français 14964

Ains i usa toute sa vie Tant quil fist, par astronomie Maintes grans merveilles aplain Il fist une mousche darain Que on drecoit en une place Si faisoit des autres tel chace Que nule autre mousche ne fist Qui vers li aprochier poist De .ij. archies bien entor Qui ne morust sans retor Tout maintenant quele passoit Labousne que il compassoit Si refist darain un cheval Qui garissoit, de chascun mal Les chevals qui malade estoient Maintenant que veu lavoient Si fonda une grant cite Sor un oef, par tel poeste Que quant aucuns luef remuoit Toute la cites encrosloit Et quant plus fort le crosloit on Tant crosloit, plus, tout en viron La vile, et en haut et emplain La mousche, et li chevals darain Et lestache ou li oes estoit Sont en naples, con les ivoit Ce dient cil qui lont veu Et aucune fois lont tenu En une cite faillir fist Le feu, si comme on le dit

Que nus point avoir nen pooit Se sachandoile nalumoit A la nature, dune fame Fille dempareor grant dame Qui li ot fait aucun anui Ne cil nen pooit a autrui Point donner, ains les convenoit Chascun feu prendre la endroit Qui pas nabeli a celui Qui li eut fait le grant anui Et fist parmi, une aigue un pont Le plus grant conques fust ou mont Ne sai ou de pierre ou de fust Mais nus ovriers tant soustils fust Charpentiers, macons nautre ovrier Qui seussent tant encerchier Dedens aigue, ne dedens terre Quil seussent raison enquerre Enquel point, cil pons fais estoit Ne comment il se soustenoit Enmi lieu, au chief, ou enmi Et passoit on bien tout parmi Un jardin fist tout clos entor Delair tout sans nul autre ator Espessement com une nue De terre molt haut estendue .Ij. cierges fist tous jors ardans Et une lampe, afeu dedens Qui ades sans estaindre ardoient Ne deriens ne sa menuisoient

Ces .iij. enclost il dedens terre Con nes peust trover ne querre Dus quatant quil deurent faillir Ne sai son iporroit venir Mais qui autant com il savoit Saroit, ces ou autres aroit Si fist une teste parlant Qui li respondoit esramment De tout ce quil li demandoit Que enterre avenir pooit Tant cune fois li demanda Dun sien afaire, ou il ala Mais ele li dist une chose Dont il nentendi pas la glose Que sil gardoit sa teste bien Il ne len avenroit fors bien Lors sen ala seurement Mais li solaus, qui chalor rent Le cervel si li eschaufa Dont pas garde ne se donna Cune maladie lemprist Dont il fu mors si com on dist Quant il parla a cele teste Nentendi pas la si[e]ne a certe De la teste [q]ue il gardoit Entendoit que de li parloit Mais miex li venist toute voie Quil eust bien garde la soie Quant morut, si se fist porter Hors de romme por enterer

A un chastel, devers sesile Pres de la mer, a une vile Encor isont li os de lui Con garde miex, que les autrui Quant on les soloit remuer Ou en lair molt haut eslever Si senfloit lamers maintenant Et venoit au chastel corant Et quant plus les levoit on haut Tant croissoit la mers plus en haut Que tantost le chastel noiast Se on bas, ne les ravalast Et quant en son droit lieu restoit Tantost lamers se rabaissoit Ausi com ele estoit devant Et ce a on prove sovent Encore idure la vertu Ce dient cil quen sont venu Soustils fu virgiles et sages Et volt prover, tous les langages Des clergies, et lor pooir I tant com plus en peut savoir Et fu de petite, estature Le dos tort, un peu par nature Et aloit la teste baissant Et devers terre regardant Maintes merveilles fist virgiles Que les gens tenroient aguiles Sil les ooient, raconter Que maint qui ne pueent penser

Que nus peust tel chose faire Ne ne sevent, veoir lafaire Comment cavient, dont tantost dient Lor dis, car volentiers mesdient De gent, que cest par anemi Que il sevent ourer ensi Et dient que sifait savoir Ne sont mie bon asavoir Et sil savoient, la maniere Il le tenroient a legiere Et adroite oevre de nature Sans mal, et sans autre figure Mais quant il ne sevent la chose Si endient la fole glose Qui si lor estoupe les iex Quil ne sevent, ne ce ne miex Il nest riens quen cest monde soit Quastronomie, bien saroit Dont querre ne peust raison Et mainte chose enferoit on Qui sambleroit miracle as gens Qui ne savroient, de cest sens Je ne di pas con ne peust Faire mal, qui tant enseust Car il nest si bonne science Con ni puist entendre marence Et con nen puist en mal ovrer Se li hom sen voloit pener Diex ne fist si bon evvangile Con ne puisse torner aguile