BnF. Département des Manuscrits. Français 14964

Il nest nule si voire chose Con ni puist metre tele glose Dont on se porroit bien dampner Qui de mal, se volroit pener Nest pas maistrie, de mal faire Li hom se puet bien amal traire Ou a bien sil en a voloir Dun et dautre, a bien le pooir Se bien pense, diex li amainne Et mals latrait, a toute painne Ja li malvais ne fera bien De ce dont il ne sara rien Il nest nule ars qui ne soit bonne A savoir, se li hom si donne Mais que chose en vers dieu neface Dont il puisse perdre sa grace On set partout astronomie Fors ice, que diex ne vielt mie Si enferoit, millor aprendre Que cele por avoir atendre Car qui adroit bien le savroit Quanquil volroit, enterre avroit Quil ne li faudroit ja rien Quil neust encor plus de bien Mais il ont plus chier, la monnoie Et si ne sevent, quest monnoie Ne porquoi ele fu trovee Et si gist toute lor pensee Ne il nont cure dou savoir Mais quasses, empuissent avoir

Et por ce ne lairons nous pas Que nous nen dions aucun cas Por cials qui ont talent daprendre Sil loent et vuelent entendre Por quoi monnoie fu establie li .xii. capitles Monnoie si fu establie Por les gens qui navoient mie Chascuns ble, ne robes, ne dras Qui ble avoit, si navoit pas Le vin, sans cangier lun alautre Si changoient, li un alautre Cestoit, por ce que pas navoient Monnoie, ne faire nel savoient Quant li philosophe ce virent Si firent tant quil establirent Vers les signors, ca en arriere Une riens petite et legere Dont un chascuns peust porter Tant quil empeust achater Ce quaillors mestier li seroit Car chascuns hom, pas ne pooit Porter apres lui tout son vivre Dont aillors le convenoit vivre Si penserent alor avis Une chose chiere non vis Qui plus commune partout fust Et quaucune valor eust Por plus adroit faire bargaigne Lun alautre par tel ensaigne Si establirent, tel monnoie

[initial: 5th row, opening initial /M/, 3 lines, in red with blue pen flourishing]

Qui fust commune en toute voie Tenue, petite, non pas trop longe Dargent, por aler par le monde Et fu dite, por ce monnoie Que les gens, mainne par la voie Ou damonester quautant vaut Ce que por vivre, alomme faut Menas en grieu, si vaut autant Comme une chose seulement Selonc le droit entendement Car il nestoit lores que une Par tout le mont estoit commune Mais or fait chascuns sa monnoie Meslee, dont on plus desvoie Que sele fust dun seul afaire Car mainte faute enconvient faire Ne lestablirent pas ensi Aillors, a ue une, et autre ci Com cil qui voloient aler Por lestat dou monde saver Se li argens estoit fors mis Des tornois et des parisis Si seroit mieudre la monnoie Por garder, et porter en voie Tant com plus petite seroit Et plus legiere, miex valroit Por ce faire, et saver sa vie Por quoi ele fu establie Car monnoie prisie nest Fors por lor et largent qui i est

Petite, et legiere lefirent Cil qui premerain lestablirent Por plus legierement porter La ou il voloirent aler Des phylosophes qui alerent Por aprendre li .xiii. capitles ENsi par lor monoie aloient Par lemont la ou il voloient Par voiaige, ou pelerinaige Ou por aquerre, aucun voiage Daucun lieu que savoir voloient Dont maint qui phylosophe estoient Qui tout voloient esprover Aloient par terre, et par mer Por miex la verite enquerre Des choses, dou ciel, et de terre Nese rostissoient pas tant As grans feus com font cil truant Maint papelart, quau monde sont Qui nul bien naimment ne nefont Fors por avoir le los dou monde Ains cerchoient, la mer parfonde Et la terre amont et aval Por connoistre, le bien et le mal Dont il soufrirent maintes paines Por miex rendre lor ames sainnes Et cil ne quierent, fors le don De maistre por avoir le non Au monde, qui si tost lor faut Malvais hom ne puer penser haut

[initial: 7th row, opening initial /E/, 2 lines, in blue with red pen flourishing]

[lower margin, quire number: .xiij.^us]

Qui de terre est, a terre tent Qui abien bee, diex latent Diex meismes, dist la parole Qui de terre est, si en parole Qui dou ciel vient et au ciel tire Sor tous autres est li plus sire Li phylosophe, qui bien seurent Ceste parole, plus chier eurent Soufrir mesaise, por aprendre Que les homors de terre prendre Car miex amoient les clergies Que dou monde les signories Platons qui fu poissans, et maistres Dathenes relenqui tous estres Neut cure de tel renoumee Ains cercha par mainte contree Et eut plus chier vergoingne avoir Et painne por enquerre voir Por aprendre que se signorie Avoir au monde que maistrie De dire riens dont nert certains Ce fist por aquerre jors mains Apollones, qui tant fu sire Laissa de son regne lempire Et sen ala povres et nus Por aprendre pris, et vendus Fu maintes fois destrange gent Com ques ni eut nul si vaillant Qui lescoutast, ne qui loist Que il onques, force imeist

[initial: 23rd row, opening initial /A/, 2 lines, in blue with red pen flourishing]