BnF. Département des Manuscrits. Français 14964

En lui achater, nen lui vendre Mais quil peust adroit aprendre Tant cercha, aval, et amont Por connoistre dieu, et lemont Quil eut plus chier, que nul tresor Quil vit seoir, ou trosne dor Un philosophe, de grant non Qui archelaus, eut a non Qui ses deciples, enseignoit Dedens son trosne ou il seoit De nature, et de bones mors Des jors, des estoiles le cors La raison, la senefiance Des choses qui ont sapience Puis rala tant par maint chemin Quil trova la table dor fin Qui fu de si grant renommee Et table dou solail clamee Ou tous li mondes fu portrais La vit il, et aprist asses De maint afaire, en cele sainne Il erra tant par terre estraingne Quil passa le flueve de gauge Sans nef, sans batel, et sans auge Et toute ynde dusqua la fin Tant com il peut trover chemin Et ou il fust ades trovoit Chose a quoi aprendre pooit Dont ades pooit porfiter Et lui devant dieu commander

Alixandres en resoufri Maint travail por aprendre ausi Mais il sen ala richement Comme rois, aforce de gent Dont il ne peut mie si bien Aprendre, nen querre dou bien Virgiles, cercha, mainte terre Por raisons, des choses enquerre Tholomeus qui fu rois degypte Ne reclama, pas laler quite Ains ala par mainte contree Tant que mainte chose eut trovee Sains pols, qui refu molt preudom Ala par mainte region Por plus aprendre, et por veoir Tous les bons clers quil peut savoir Sains brandains, ne fina desrer Ades, et par terre et par mer Por aprendre, tant seulement Et vit mainte merveille grant En une isle vint lau il vit Oisiaus parlant, com esperit Qui li dirent aucune chose Dont il lor demanda la glose Si ala par mains autres lieus Tant que un lieu vit perilleus Plain de peril, et de torment Que nus ne porroit penser ens Un home ivit qui respondi Que cert judas, qui diex trai

Qui .c. fois tormentes estoit Le jor, ne morir ne pooit Et autres grans mervailles vit Si com en son livre descrit Maint autre qui molt de bien seurent Cerchierent le mont, ou quil peurent Por miex connoistre mal et bien Si ne sespargnoient de rien Ne voloient pas si tost croire Chose quil ne trovassent voire Ne quan quen lor livres trovoient Dusquatant ques prove lavoient Por miex dieu connoistre et amer Ains cerchoient toute lamer Et tant que tout cerchie avoient Puis arriere se repairoient A lor estudes, por tous jors Clergie aprendre et bonnes mors Si amoient, philosi^ophie Por als connoistre, et droite vie Mais por ce que nomme lavons Aucune fois, vous endirons Quel chose phoilosophie est Dont si grant sapience naist Qui lomme puet a ce mener De lui connoistre, et dieu amer Philosophie, est connoissance Et fine amor, de sapience Des choses savoir les covines Des humainnes, et des devines

[initial: 27th row, opening initial /P/, 4 lines, in blue with red pen flourishing]

Por connoistre, lui et son estre Quels il est, et quels il doit estre Si qua ce, se puisse mener Que tous se puist adieu doner Qui bien connoist, lui et sa vie Si set toute, philosophie Car tout cil philosophe sont Qui diaus droite connoissance ont Dont platons respondi aucun Qui li demanda, en commun Sire platon quaves apris Qui tant aves vostre tans mis Et estudie, por aprendre Quels biens, nous faites vous entendre Car nous dites aucun bon mot Et platons qui plus que nus sot Lor dist si com a cuer dolent Quil navoit riens apris, fors tant Quil se sentoit, et jor et nuit Ensi com un vaissel tout vuit Tant lor en respondi platons Et sestoit li plus sages hons De plus grant science parfonde Con seust lors, entout le monde Nen diroient or pas autant Maint, ancois feroient samblant Quil seussent toute clergie Por los avoir, cil mals les guie Et si lor met, foles ententes Rien plus que bestes, nont ententes

Et quant sevent aucune riens Quaucune fois lor samble biens Maintenant cuident tout savoir Quanque fals cuide, nest pas voir Et par ce connoist on les sos Mais nen curent fors que les los Dou siecle se painent trichier Quil comperront encor molt chier Miex lor venroit tel chose aprendre Qui droit lor peust faire entendre Si com cil sage faisoient Qui si peu le siecle prisoient Qui usoient toute lor vie En aprendre, philosophie Ensi estudioient lors Li philosophe apres lor mors Por adrecier, et por atraire Aus et les autres a bien faire Et se penoient dadrecier Les autres gens alor mestier Si controvoient lesmonnoies Que les gens portent en coroies Por lor vivre achater aillors Car on nel donne pas tous jors Por les convoitises des gens Qui paor ont de lor despens Ce nest mie droite nature Car par raison, et par droiture Devroit cascuns prendre son vivre Ou siecle, si quil peust vivre