BnF. Département des Manuscrits. Français 14964

Ensi et jor et nuit aloit Tornoiant et faisoit son tor Avec le firmament entor Ensi com ele fait encore Sans remuer, mais la gent dore Pensent or plus a autre afaire Por lor lasses piaus crasses faire Qui si tost vont a pourreture Tout par lor vilainne apresure Qui les livre a honteus essil Ensi ne faisoient par cil Car ne queroient fors mengier Tant quil peussent alegier Lor faim por lor cors soustenir Et lor cors ensante tenir Sique de lor sens se peussent Aidier, quant mestier en eussent Por venir ala droite sente De la gloire dieu dont li .xxx. Vivoient lors plus longement Que ne font orendroit li cent Par contenance vainne et fole Nentendent pas bien la parole Que ihesus cris dist au diable Quil le cuida tempter par fable Quant il li dist que pain feist De pierre, et diex tantost li dist Li hom ne vist par en pain soul Qui son ventre li fait saoul Mais il vist de toute parole

De quoi la bouche dieu parole Se bien ceste chose entendoient Plus volentiers en aprendroient Les paroles qui de dieu vienent Mais les grans ventes quil retienent Lor vies si lor ramenuisent Por les mengiers qui tant lor nuisent Que nature nes puet soufrir Dont plus tost les convient morir Ensi lor grant avoir lor emble Lor sens, et lor cors tot ensamble Que petit sevent alamort Dont pluisor sont dampne et mort Qui conseillier ne se pooient Quant millor mestier en avoient Ne vivoient pas comme cil Qui por aus oster de peril Sestudioient en clergie Et usoient ensi lor vie Quil voloient si vivre lors Que il soustenissent lor cors Tant com au siecle se vivoient Si comme cil qui bien savoient Que peu lor durroit ceste vie Si navoient nule autre envie Fors que de querre tel science Dont il eussent sapience De connoistre le souverain Qui tout avoit fait desamain Et penserent bien enlor sens

Comme gens de noble porpens Que ja navroient connoissance Ne de dieu ne de sa poissance Se deses oevres nenqueroient Ancois tant que savoir porroient Ja ne connoistra bien son maistre Qui ne connoist ancois son estre Par luevre connoist on louvrier Por ce se vaurent essaier A soevres dieu premierement Por avoir plus legierement Connoissance de son pooir Et quant plus porroient savoir De ses oevres et de ses sens Tant avroient miex lor porpens Damer le verai creator Qui avoit fait si noble ator Com li ciex ert que il veoient Et les estoiles qui luisoient Et ses mervilleuses vertus Dont il le priseroient plus Et tant com plus le priseroient Plus volentiers le serviroient I ce fu lor ententions Dedieu connoistre lor raisons Car bien seurent deverite Que diex lor avoit sens doune Por raison et nature enquerre Des choses dou ciel et de terre Tant complus savoir empeussent

Autrement bien pense neussent Car nus hom deses haus secres Tant soit sages hom ne discres Ne porroit enquerre raison Deses miracles se il non Car tout set par fine droiture Mais de celes qui par nature Sont faites en air et en terre Puet bien li hom raison enquerre Daucune sil est de bon sens Et en clergie met son sens Et puis que raison eurent quise Et por lor grant estude aquise Por quoi tous li mondes fu fais Si com ci devant est retrais Si penserent que bien porroient Puis que dou tout raison avoient De partie raison savoir Aucune selonc lor pooir Au mains deciaus que il peussent Veoir aciaus com loins quil fussent Ensi vaurent raison savoir De ce quil veoient mouvoir Les estoiles dou firmament Et reluire si clerement Ce fu ce ques mist en entente Premiers daquerre lor science Plus tost des choses quil veoient Et en ce tout leur cuer metoyent Que de celes dont nule part

Navroient de lor iex regart Por ce furent il esmeu Denquerre ce queurent veu Le firmament ensi mouvoir Tant quil en seussent levoir Et dirent que mout bon faisoit Savoir ce qui adieu plaisoit Et de ses oevres naturiex Por miex croire que il fust diex Car on ne puet trouver raison De dieu se par ses oevres non Li vrai preudomme ancien Qui de ce sa penserent bien Neurent de nul autre avoir cure Fors daprendre science pure Ne furent mie couvoiteus Davoir, ains i ot molt deteus Qui de lor avoir sapercurent Comme saige homme que il furent Que tost y porroient penser Aucune fois par als garder Ou au despendre mettre cure Quil despendissent amesure Ou por autres oevres asses Que cil ont qui ont amasses Si lor peust ensi tolir De lor aprendre aucun loisir Tant que ensi le departoient Que li un emmer le getoient Li autre le clamoient quite