BnF. Département des Manuscrits. Français 14964

Si porroient il bien chaoir Dedens le firmament trestuit Et si avroit encor de vuit Por als esbatre sil voloient Et joer com faire soloient Si pueent bien savoir les gens Que molt est damediex poissans Et molt par est de noble afaire Quant si hautes choses set faire Com est li solaus, et li ciels Tels sires doit bien estre diex Qui set faire si nobles choses Que nous veons ou ciel encloses Dont molt le doit chascuns amer Et bien puet chascuns hom penser Que par desus est molt gentis Quant ce desous, est si soutis Car ce quest desus est plus grans Que ce desous .c. mile tans Et plus con ne porroit conter Par nombre con seult penser Car cest chose sans nul termine Qui nule part ne sa define Por quoi je ne puis pas entendre Que nule riens puisse comprendre Ce quest desus le firmament Ou paradis son lieu porprent Ne raemplir, por riens qui soit Se li biens dieu nel remplissoit Mais diex est si plains de tous biens

Quil raemple toute autre riens Dont on dit que pechies riens nest Por ce que de tous biens vuis est Et cors et ame fait si vuit Que lun avec lautre destruit Car mals vait tous jors anient Et li biens tous jors encroissant Por ce nest mals, ne pechies riens Qua noient vienent comme fiens Nule riens nest quadroit doit estre Fors ce que parmanant doit estre Dou bien se fait bon tenir pres Car il amende tout ades Et qui le bien volentiers fait Li biens em paradis latrait A force, et estre li estuet Car aillors demorer nepuet En paradis, lestuet venir Por lieu prendre, et lieu acomplir On ne porroit tant de bien faire Quades ne trovast son repaire Car cis lieus na point de termine Ne nus biens ni defaut ne fine Et est tous plains sans point de vuit Damors, de joie, et de deduit Dont chascuns tous sires sera Qui vers dieu le deservira Denfer et combien il est grans Denfer vous repuis ie tant dire Ou il na fors duel et martire

[initial: 29th row, opening initial /D/, 2 lines, in blue with red pen flourishing]

[NB: "A", first letter, 16th line, is dotted; meaning unclear]

Quil ne porroit pas estre emplis Se tous li mons estoit peris Et tuit en enfer sen alassent Ne por chose quil porchacassent Quil ne fesissent male fin Et quades narsissent sans fin Si ai ce dit por ce briement Que on sache tout vraiement Quil nest riens que on puisse entendre Quau pooir dieu, se puisse prendre De riens nule car tant est plains Li glorieus, li souverains De grant poissance, et de grans biens Que ni porroit comparer riens Car cest cil qui tout establi Mais puis que dit vous avons ci La grandesce, dou firmament Qui tous jors est en movement Ou les estoiles mises sont Si entendes vu ciel amont Ou eles ne se muevent point Ains sont ades en un seul point Si com vus hom qui sem vast Daucun lieu, et aillors alast Li premiers lieus ne se movroit Sais cil qui ades sen iroit Si com par un cercle en viron Ou il revenist dus quenson Sovent iroit, de lieu en lieu Tant quil venroit ou premier lieu

Mais li lieus ne se removroit Quades en un point se tenroit Ausi de ce ciel entendes Que nus lieus ni est remues Destoile, ne defirmament Ains se tienent tot fermement Ce ciel moustrent en terrre bien Cil qui sont astronomien Cest cil qui dient qui nous rent Labloe coulor, et nous tent A mont ou ciel quant nous veon Et quant lairs est purs en viron Et est desi grant, atemprance Quil ni puet avoir violance Cil ciels enclot le firmament Or dirons nous apertement Que ce con puet desus entendre Par oir ne puet on entendre Ne prover se cest voirs ou non Par nule art de demoustroison Si com de ce Quon puet veoir Car sens domme nia pooir Mais ne pour quant Nous en dirons Ce quen aucun Livre trouvons Quaucun philosophe trouverent Quaucune raison I moustrerent

Qui envers dieu deservi la Et il voit tout, et ca et la Par tout est, et par tout regarde Com cil qui tous biens a en garde Dont essample prendre poes Par aucun que parler oes Car il oit sa parole toute Cascuns qui cele part escoute Toute lentendent pluisors gens Ensamble, et en un seul tans Chascuns toute la parole oit Ausi poes, par un seul mot Que pluisor oent chascun jor Entendre dou regne par tout Et entous lieus i elment est Com laclartes qui dou feu naist Qui enlumine une chose autre Ausi tost lune comme lautre Metes pluisors choses entor Ausitost venra lesplendor A celi qui sera de ca Com alautre qui iert dela Quant ces choses ont ces vertus Bien endoit encor avoir plus Cil qui tout fist, et tout cria Et qui tous biens dedens lui a Son paradis estent partout Com cil qui sires est de tout En paradis, sont tuit li angle Tuit li saint, et tuit li archangle