BnF. Département des Manuscrits. Français 14964

Mais au mains tant vous endirons Quil nia nule si petite Qui por veoir isoit eslite Qui plus grans ne soit molt sans doute Que la terre, et laigue toute Mais ni par a nule si grans Com li solaus, ne si luisans Qui toutes autres enlumine Par sa biaute, qui molt est fine De terre tres quau ciel amont Ou ces estoiles miles sont A .x. mile fois autretant Et .lv. fois autant Com toute la terre, adespes Qui set conter si puet apres Trover, et le nombre, et la forme Quans ponches il a de main domme Quans pies, quans pas, et quantes lieues Ou quantes miles, estendues Ou quantes jornees il a Dus quau ciel mais tant en i a Que suns hom ipooit aler Droite voie, sans arester Et peust faire chascun jor .Xxv. miles, sans sejor Ancois seroit passes litans De .vij. mile, et .c. et .l. ans Et .vij. ans, et demi avec Ains qualeis fust dusques iluec Que dus quas estoiles venist

Se li premiers hom que diex fist Adans ifust tous jors ales Des ce quil fu primes cries .Xxv. miles chascun jor Ne fust il pas atel labor Ains eust, aaler encore Par .vij.^.c. et xiij. des lore Quadans li premiers hom fu fais Quant premierement fu parfais Cil livre, par comparoison En lan de lincarnation Mil, et cc. xlv. ans Fu il translates en romans Sil dont se fust meus daler Adam seust pris a aler Des lors, ains quil fust dusque la Ou sune grans pierre estoit la Qui .c. ans au cheoir mesist Si convenroit, quele chaist Dedens chascune, eure dou jor Dont il a .xxiiij. ou jor .Lx. mil, et .xiij. encore Et plus de demie eure encore Ancois qua la terre venist Ce prova, qui cest livre fist Ancois quil le mesist avant Cest bien .xl. fois autant Com uns chevals porroit aler Quades ne fineroit dambler Or pent qui vielt si puet entendre

Sune pierre porroit descendre En une eure tant com il pose Car nisai faire millor glose Dou nombre des estoiles et de Lor ymages li .xviii. capitles Des estoiles vous di le nombre Si com tholomeus le nombre En son almaieste, quil fist Qui toutes le nomma et dist Quil en i a, mil toutes netes Et .xxij. sans les planetes Conter les poes, sans peril En toutes .xxix. et mil Bien en ipuet pluisors avoir Mais plus nen ipuet on veoir Com puist veoir entierement Ne reconnoistre, apertement Si igart, qui garder i vielt Car nus plus conter nen ipuet Mais nus hom ne porroit conter Tant seust, nen haut lieu monter Fors par un estrument gentil Que tholomeus fist soutil Par quoi on les connoist, et conte Et ou chascune siet par conte Combien il a de lune a lautre Soit lons ou pres lune de lautre Et des ymages connoissances Qui les forment par lor samblances Par autre estrumant quil trova

[initial: 6th row, opening inital /D/, 4 lines, in blue with red pen flourishing]

Trueve on combien a dusque la Ces estoiles, qui sont nommees Sont ou ciel toutes figurees Et compassees, par ymages Qui toutes ont divers estages Chascune son non, et sa forme Par qoi on les connoist, et nomme Dont on connoist principalment .Xlvij. ou firmament De ces prent on .xij. plus dignes Con apele, les .xij. signes Et font un cercle, tout entor Ou li planete, font lor tor Molt sommes dou ciel eslongie Car cil qui pris est, em pechie Jamais nul jor ne venra la Et lame qui deservi la I est alee en mains dune eure Et plus encore, tout deseure Si haut en paradis amont Que nus hom qui soit en cest mont Ne porroit penser la hautesce Ou lame va, ne la leesce Que nus ne porroit tant penser Ne ne le porroit comparer Le grant, et le haut de lasus, A la grandesce de ca jus Qui est de terre, au firmament Car cele est sans, definement, Et sest li firmamens si grans

Si haus, si larges, en tous sens Qua painnes porroit nus penser Le nombre, qui porroit entrer De terres, quempliir le porroient Sen un seul lieu toutes estoient Dont chascune, ausi grans seroit Que toute la terre qui soit Mais toutes voies endirons Ce que miex penser en poons De la grandor dou firmament et Dou ciel desus li .xix. capitles Se la terre plus grans estoit Cent mile tans, quele ne soit Et si eust, cent mile tans Plus quil ni eut onques de gens Et chascuns dals, si poissans fist Quen un autre engenrer poist Chascun jor dusqua .c. mile ans Et fust chascuns com uns gaians Si eust chascuns, son ostel Si grant com ques rois neut itel Bos, rivieres, fours, et molins Chans, pres, vignes, et jardins Chascuns tout entor sa maison Por vivre a si grant foison Que chascuns enpeust furnir .C. maisnies, alui servir Et chascuns, de cele maisnie Tenist .x. autres, de maisnie Et porpris grant, por son manoir

[initial: 12th row, opening initial /S/, 2 lines, in red with blue pen flourishing]

[lower margin, quire number: .xiiij.^us]