Walters Ms. W.199, Gossouin of Metz, Image du Monde

leur art et par leurs sens jusques aux estoilles tout en hault dont ilz vouldrent savoir la mesure pour mieulx congnoistre leur nature. Mais premierement voldrent mesurer la terre et prouver sa granduer Et lors quilz eulrent la terre mesure alentour par ung art quilz sceu rent et prouve par droitte raison ilz la trouverent tout environ aussi comme len feist dune chainture une tour et puis fust la chainture estendue par le long et qui lors yroit du long de la chainture il trouveroit sa longueur grande. xx . M iiii . C et xxvii . miles. Dont la mile contient. mil pas. le pas . v . pies. et le pie . xiiii . pouches Tant a la terre de longueur entour par che trouverent ilz apres combien elle a despez par my et trouverent son espoisseur comme selle fust partie parmy. Laquelle a de longueur par dedens . vi . M et . v . C miles. Par ceste figu re daraine qui est selon nature droitte ilz mesurerent justement tout le hault du firmament. Car ilz ne sceu rent prendre ailleurs plusgrant mesure pour esten dre la grandeur de toutes choses qui sont encloses dedens le ciel:- Combien la lune et le soleil ont chascuN de leur propre haulteuR :-

LA terre commune poserent les anciens phi losophes apres che ilz mesurerent les estoil les et les planettes et le firmament. En apres ilz voldrent mesurer la lune et prouver sa gran deur Si trouverent que le corps de toute la terre de dehors et dedens qui fut leur commune mesure estoit plus grant que le corps de la lune trente noeuf tant. et ung petit plus es ensus de terre si loings bien . xxiiii . tant et demy que la terre na despez par le milieu. et les cincq douzai nes avec tant a de haultesse et de grant. Aussi pareille ment touchant le soleil prouverent ilz par vraie de monstranche et par raison que il est plus grant que toute la terre nest par cent et soixante six foiz. mais ceulx qui riens nen scevent le croient a grant paine et si est souffissanment prouve tant par maistrise comme par le vray sens de geometrie. dont les pluseurs se sont depuis le temps des philosophes penez et tra veilliez pour en savoir la verite se ainsi en estoit com me dit est ou not tant que par visue raison ilz prou verent que les anciens avoient dit verite. Aussi bien de la quantite comme de la haultesse et au regard de

celui qui ceste besongue compila y mist toute son enten te et tout son temps pour che que si tresgrant merveil le en avoit tant quil perceu plainement che dont il ce stoit moult doubte. Car il vey tout appertement le so leil estre trop plus grant que la terre sans aulcune def faulte par cent et soixantesix foiz. et les trois parties vingtiesmes de la terre avec tout che sicomme le anciens le disrent. Et lors creut celui tout leur donne a enten dre ne ja neust par lui este mis par escript se certaine ment la verite nen eust este par lui plainement trou vee. Et che poeut on bien savoir par grant quantite Car moult est loings de nous assiz quant il nous sem ble si petit. ne ja ne sera si ensus de nous que bien ne le sachons chi bas. Et a la verite il ya depuis la terre jusques au soleil sicomme le roy tholomeus le prouva v . C . iiij^xx . et . v . tant que toute la terre poeut avoir de grant ne despez parmy. Chi parle de la haulteur des estoilles et de ORes vous voeul je racompter leur grandeur en brief du fait des estoilles du firmement dont il ya si tresgrant nombre. et si sont toutes dune meisme haulteur mais elles ne font pas

toutes dun grant. Si convendroit trop longue narration qui de toutes voldroit descripre la granduer et pour tant nous en passerons plus au brief. Touteffoiz je vous ad vertiz et certiffie de tant que nulle nen a si petite pour tant que len la puist veoir quelle ne soit plus grande que toute la terre nest. Mais il nen ya nulle par si gran de comme est le soleil ne si reluisante. Car il enlumine toutes les aultres par sa beaulte qui tant est noble et fine. De la terre jusques au ciel ou les estoilles sont as sisez amont. Car il ya dix mil foiz autant et cincquante cincq foiz plus comme toute la terre a despoiz. Et qui scet compter apres le nombre et la fourme si poeut trouver quants pouces il ya de la main dun homme et quans pies et quants pas et quantes lieues et quantes mi les et quantes destres et quantes journees il ya jus ques au ciel. Mais tant en ya que se ung homme y povoit aler la droitte voye sans soy arrester et que chascun jour il pevist franchement aler vingtcincz miles et sans fair nul sejour avant seroit passe le temps de sept mil cent et cincquante ans et sept et de my avec ainchois quil eult fait autant de chemin

quil ya dichy jusques au ciel ou les estoiles sont. Se le premiere homme que dieu fourma oncques che fut Adam y fut premierement ale des lors que de dieu fut premierement fait et cree. et fut ale vingt miles par chascun jour si ne fut il pas ancores la ains eult il ancores a aler lespace de sept cens et trese ans des a dont que Adam le premier homme fut fourme quant premierement fut parfait cestui par le vray acteur Che fut a laparition en lan de grace mil deux cens quarante et six. Autant il feist meist il a y aler des lors ainchois que il fut jusques la. Ou se la avoit une grant pierre qui cent ans a cheoir meist il con vendroit quelle fust avalee en chascune heure du jour dont il ya vingt quatre en ung jour complet quarante mile et trese et une demie ainchois quelle venist jus ques a terre. Ceste chose fu prouvee par celui qui che present volume compila ainchois quelle venist jusques ychi. Cest bien autant par quarante foiz comme ung cheval pourroit aler qui tousjours yroit sans soy arrester Ores qui voeult si porra entendre se une pierre pourroit autant devaler en une heure comme