Image du Monde en vers

por le deluge Li disismes comment on retrova clergie apres le deluge Li unsismes des merveiles que virgiles fist par astronomie Li .xii. comment et por quoi monnoie fu establie Li .xiii. des philosophes qui cerchierent le monde por aprendre Li .xiiii. de philosophie, et de la response platon. Li .xv. combine la terrre a delonc environ, et combien despes parmi Li .xvi. combien la lune et li solaus contient de grant, et de haut, cascuns endroit soi Li .xvii. de la grandor et de la hautesce des estoiles. li .xviii. de la grandor dou firmament, et dou ciel qui est desus Li .xix. dou nombre des estoiles et delor ymages. li .xx. dou ciel cristallin, et dou ciel empire. li .xxi. dou celestre paradis, et de son estre Li .xxii. si est li recors ou la recapitulations de ces choses li prologues Qui bien vielt entendre cest livre Et savoir comment il doit vivre Et aprendre tele clergie Dont miex vivra toute sa vie Si lise tout premierement Et apres ordeneement Si quil ne lise riens avant Sil nentent ce qui est devant Ensi porra le livre aprendre

[initial: 22nd row, opening initial /Q/, 2 lines, in blue with red pen flourishing]

Et lautre moitie descendoit Tant quil saprochoit de couchier Qui la nuit faisoit aprochier Et lors reveoient la nuit Les estoiles et lor conduit Tant que li solaus revenoit Qui tout le jor en luminoit Et sen aloit ledroit chemin Tant quil repairoit au matin Si regarderent de la lune Qui diversement estoit une Selonc ce quele apert au monde Et lune fois estoit reonde Et alautre aparoit demie Ausi comme parmi trenchie Apres cornue devenoit Ensi defaillant sen aloit Tant que nestoit pas plus veue Apres aparissoit cornue Puis demie, puis toute plainne Si com devant et ausi sainne Puis sorent bien par lor esteil Que le saprochoit dou soleil Dus quatant quen droit lui estoit Et puis des lor sen departoit Et apres sen eslongoit plus Tant quele estoit ausi ensus Si com ele avoit fait devant Et lors sen aloit aprochant Puis sen partoit puis sen venoit

Ou chascuns puisse sens humains Ne por ce nen remaint pas mains Car cest ausi com la fontainne Tant keurt plus loins et plus est sainne Et tant com li rus keurt plus loing Tant trueve on plus aigue au besoing Tout autresi dire vous puis Que paris est ore li puis Ou on puet plus puisier science Quavoir ipuet la demourance Mais puis cedi quensi clergie Est en france plus avancie Par raison savoir endevroient Li hoir de france sil daignoient Car ausi comme li solaus Des estoiles est li plus biaus Dont tant de biens puet naistre au monde Por le grant bien quen lui habonde Ausi doit li rois miex valoir Des autres gens et plus savoir De clergie, de sapiance Si quil puisse par la vaillance Entre les autres si reluire Quautre gent si puissent conduire Par bien faire vers li atraire Par essample de son bien faire Ensi seroit il rois adroit Em paradis, et ci endroit Si seroit bien, drois et raisons Quil mesissent, entencions

Na vers le ciel point de grandor Ne que li p[u]is quemmi seroit En vers le plus grant cercle aroit Que vous peussies sor la terre A compas fair por conquerre Non qui seroit ou ciel lassus Et regardast vers terre jus Et la terre fust toute ardans Entour com uns carbons flammans Plus petite li sambleroit Que la menre estoile qui soit Ou ciel de terre ca aval Fust en montaigne fust en val Et par ce puet on bien savoir Que tout convient le ciel movoir Quant faire li convient un tor En tor la terre chascun jor Si com a percevoir poons Par le solail que nous veons Au main lever en oriant Et couchier devers occidant Et puis apres a lendemain Le reveommes nous au main Car lors a il parfait un tor Que on claimme naturel jor Qui jor et nuit enli contient Ensi vait li solaus et vient Que ia daler navra repos Avec le ciel si com li clos Qui fichies est en une roie

Cis lieus est dis, drois miedis Car tout enmi, le monde est mis Li autres chies de cele ligne Qui devers senestre se ligne Apele on, septemtrion Et prent des .vij. estoiles non Qui torne vers latres montaigne Qui par mer les maronniers mainne Et lautre ligne quest enmi Que li midis trenche parmi En la fin devers oriant Si com li auctor vont disant Est li terrestres paradis Ou adans fu cries ja dis Cil lieus est oriens clames Car la nous est li solaus nes Qui le jor nous rent en viron Lautre chief occident anon Car li jors faut et obscur cist Quant li solaus cele part gist Ensi ont par ceste raison Les quatre pars dou monde anon Li premiers contient orient Et li secons, a occident Miedis le tiers, et puis le quart Ra septemtrion en sa part Si les poes par ceste ensaigne Entendre qui le vous ensaingne